Vendimin e Kuvendit për të kthyer për rishqyrtim dosjet e kandidatëve për institucionet e Vettingut, te Avokati i Popullit, kryetari i komisionit të posaçëm për reformën në drejtësi Fatmir Xhafaj, e cilësoi si akt për ti dhënë ligjshmëri procesit, por Partia Demokratike, këmbëngul se procedura është antikushtetuese dhe ekstra ligjore.
Demokratët pretendojnë se në muajin gusht kur diskutohej në kuvend ligji për Vettingun, kanë propozuar një fazë paraprake që mundësonte plotësimin e dokumenteve të kandidatëve të cilët vlerësoheshin pozitiv për institucionet e Vettingut, më qëllim që çdo veprim mbi procesin të kishte bazueshmëri në ligj.
Neni 14 i propozimeve të Partisë Demokratike për ligjin e Vettingut ilustron këtë pretendim:
“Brenda 5 ditëve nga regjistrimi i kërkesës, Sekretari i Përgjithshëm i institucionit të Presidentit të Republikës, mund të kërkojë nga kandidati plotësimin e dokumentacionit . Nëse dokumentacioni i kërkuar nuk paraqitet brenda afatit, vlerësimi i kandidatit bëhet me dokumentet dhe informacionet që gjenden në dosjen e tij”
Por sipas demokratëve në atë kohë, mazhoranca e rrëzoi propozimin duke e cilësuar si antikushtetues, siç thuhet në procesverbalin e mbledhjes së komisionit të posaçëm të reformës në drejtësi i datës 23 gusht të vitit 2016.
“Vasilika Hysi – Neni 14 i variantit të opozitës që amendon nenin 7 të draftit, që ne kemi parë, bie ndesh me Kushtetutën. (faqe 52)
Partia Demokratike, thotë se mazhoraca me vendim parlamenti realizoi të njëjtin propozim, në kundërshtim me ligjin duke futur në dyshime seriozë kushtetutshmërinë dhe ligjshmërinë e tij.
Amendamente Ligji i Vettingut Nenet 1-25
OraNews.Tv
