Kuvendi i Shqipërisë harxhon 412 milionë lekë të vjetër vetëm për biletat e avionëve për deputetët. Në një raport financiar të Kuvendit, të cilin e ka siguruar Report TV, nxjerr në pah një tjetër detaj interesant.
Kuvendi, jo vetëm që do të harxhojë 412 milionë lekë për bileta, por këto para do t’i marrin vetëm tre agjenci udhëtimi, të paracaktuara, me marrëveshje.
Biletat, Raporti: Marrëveshja deri në 2019, s’tregohen agjencitë
Edhe pse raporti nuk tregon se kush janë këto tre agjenci dhe si janë përzgjedhur, ajo që thuhet, është se kjo marrëveshje e nënshkruar, nuk është vetëm për vitin 2017, por tre vjeçare, deri në vitin 2019.
Kryetari i ri i Kuvendit, dhe administrata e tij do të gjenden përpara këtij fakti të kryer që do të kushtëzojë financat dhe punën e tij për tre vite.
Raporti i Report TV: Fondin e marrin vetëm 3 agjenci udhëtimi
“Në Kuvendin e Shqipërisë specifike është udhëtimi jashtë shteti për shkak të aktiviteteve të shumta ndërparlamentare të delegacioneve të përhershme në organizatat Ndërkombëtare, të grupeve të miqësisë, udhëtimeve zyrtare, pjesëmarrja në Sesionet e KiE-së, etj.
Për këtë është nënshkruar marrëveshja kuadër për blerjen e biletave me tre operatorë. Kjo marrëveshje është për një fond prej 41.2 milion e shtrirë dhe në vitet 2018 dhe 2019. Për vitin 2017 janë planifikuar 33.2 milion, ndërsa si 4 mujor janë shpenzuar rreth 5 milion lekë.
Shpërndarja e aktiviteteve nuk është e njëtrajtshme gjatë muajve të vitit, nuk mund të bëjmë krahasime me një plan katër- mujor, dhe duhet të theksojmë se viti 2017 është viti i një bojkoti nga opozita për gati tre muaj në këtë katër- mujor si dhe vit elektoral”, thuhet në raport.
Kuvendi tender 105 milionë lekë për autovetura
Në të njëjtin dokument, thuhet edhe se Kuvendi është duke tenderuar blerje automjeti, me vlerë 105 milionë lekë të vjetër.
