Hetimet mbi vrasjen e
Artan Santos duket se kane avancuar, sikurse deklaroi
Prokurori i Përgjithshëm i Shqipërisë, Adriatik Llalla. I intervistuar nga Zeri I Amerikës , ai tha se janë mjaft të dhëna në process hetimi. Prokurori Llalla nuk ka theksuar detaje por ka lënë të kuptohet se gjatë investigimit mbi vrasjen janë mbledhur të dhëna të konsiderueshme. Pak ditë më parë një qytetar deklaroi në news24 se ka raportuar në ministrinë e Brendshme për emrat e autorëve të varsjes së Santos.
Zëri i Amerikës:
Disa muaj më parë ndodhi vrasja e bujshme, shumë e shëmtuar e bankierit Artan Santo. Cfarë është bërë lidhur me hetimet?
Prokurori i Përgjithshëm A. Llalla:
Eshtë një çështje tepër e ndjeshme për opinionin publik shqiptar rasti i vrasjes së këtij bankieri në qendër të kryeqytetit të vendit. Hetimet për rastin janë intensive, po kryhen në bashkëpunim të ngushtë me të gjitha institucionet e tjera me të cilat ne koordinojmë punën tonë, me policinë e shtetit, shërbimin informative shtetëror e të tjera. Kemi mjaft të dhëna në process hetimi.
Zëri i Amerikës:
Mbi çfarë pistash po zhvillohen hetimet?
Prokurori i Përgjithshëm A. Llalla:
Hetimet janë të gjithanshme, pistat gjithashtu. Ka dyshime të ndryshme për mënyrën dhe qëllimin se si u vra ky biznesmen, përgjigje të cilat normalisht do të jepen në vazhdim të procesit.
Zëri i Amerikës:
Një pyetje lidhur me ligjin e ri për policinë, i cili përfshin edhe krijimin e Byrosë së Hetimeve. Eshtë folur shumë se kjo agjenci e re, nëse krijohet, do të ishte një dublim i punës së Prokurorisë së Përgjithshme. Cili është komenti juaj?
Prokurori i Përgjithshëm A. Llalla:
Ky ligj tashmë ndodhet në proces shqyrtimi në Gjykatën Kushtetuese. Prokuroria shqiptare ka dhënë mendimin e saj për mënyrën e ndërtimit dhe hartimit të këtij ligji. Ne kemi patur rezervat tona për krijimin e kësaj byroje hetimi. Megjithatë, presim versionin përfundimtar të Gjykatës Kushtetuese. Në varësi të këtij vendimi, ne do të jemi të detyruar të zbatojmë vendimet e ligjvënësve shqiptarë dhe të Gjykatës Kushtetuese.
