OSBE kritika për legjislacionin e TVSH-së, Rama bënë autokritikë dhe justifikohet

OSBE tërhoqi sot vëmendjen e politikës për bllokimin e legjislacionit për TVSH. Nga ana e tij, kryeministri Edi Rama, bëri autokritikën e radhës, duke mos harruar edhe ndonjë justifikim “për mungesë konsensusi”.
Kritikat e , shefit të OSBE në Shqipëri, Florian Raunig, u bënë gjatë konferencës mbi infrastrukturën dixhitale, ku ishte i pranishëm edhe kryeministri Edi Rama.
Në këtë konferencë, shefi i OSBE në Shqipëri, Florian Raunig theksoi se dixhitalizimi nuk është vetëm një progres, por edhe një mundësi për të dërguar mesazhe më të mira në Shqipëri.
“Ky treg transmetimi duhet të japë mundësi për çdo mjedis ekonomik pa privilegj dhe pa monopol. Kjo konkurrencë e drejtë duhet të tregojë se biznesi nuk duhet të jetë vetëm një pjesëmarrje rentabël, por duhet të ketë edhe përgjegjësi. Për 2 vite partitë parlamentare nuk kanë mundur të zbatojnë legjislacionin dhe kjo bllokoi procesin e transmetimit të RTSH-së dhe nuk bëri të mundur që ai të kthehet në transmetues të mirë publik që kontrollohet nga publiku është hartuar për publikun dhe financohet nga publiku”, u shpreh , Raunig.
Pas kësaj ka reaguar Edi Rama, i cili duke bërë autokritikë, ka pranuar mungesën për miratimin e ligjit.
“Gati prej një periudhe të gjatë prej 1 viti e gjysmë bllokimi të RTSh-së, për shkak se është bërë një ligj i cili është bërë me gjithë vullnetin e mirë për të pasur konsensusin mbi bazën e çdo vendimmarrje, por në këndvështrimin tim, tanimë mbi bazën e kësaj eksperience është e domosdoshme të bëhet një ndërhyrje në këtë ligj pasi në fund të fundit dhe RTSh, i cili është një entitet publik, nuk duhet të harrojmë që është një kompani, dhe kompani që funksionojnë me konsensus të të gjithë anëtarëve të bordit nuk ka. Nëse kompanitë në botë do të kishin konsensusin e çdo anëtari bordi do kishin falimentuar më shumë se do arrinin të zhvilloheshin.
E vetmja kompani që punon me konsensus është BE por edhe BE për shkak të konsensusit siç e shohim ka jo pak vështirësi. Sidoqoftë TVSh nuk mund të jetë një kopje e BE-së dhe nuk mund të ketë në bazë të vendimeve të veta konsensusin aq më tepër në kushtet kur bëhet fjalë jo për konsensusin mes anëtarëve të bordit por mes përfaqësuesve të zgjedhur politik. Për këtë arsye ne do të propozojmë një ndryshim të ligjit që garanton mundësinë për konsensus por që nuk e lë TVSh peng të mos arritjes së këtij konsensusi. Edhe ky proces kërkon lideriship menaxherial dhe nuk mund të merret peng nga dëshira apo mos dëshira. Do ta çlirojmë nga të qenit viktimë e pamundësisë  për të arritur konsensus mes  partive”, u shpreh Rama.