Frroku nga spitali për prokuroinë: Nuk kam gjë për të thënë për çështjen “Doshi”

Deputeti Mark Frroku është marrë sot në pyetje për çështjen “Doshi”. Pyetja e Mark Frrokut është bërë në ambientet e një spitali privat në kryeqytet, ku deputeti ndodhet aktualisht pasi dy ditë më parë shfaqi probleme me zemrën. Në këtë takim i cili zgjati vetëm 10 minuta, mësohet se Mark Frroku i është përgjigjur shkurtimisht pyetjeve duke i qëndruar deklarimeve të tij të mëparshme për çështjen “Doshi”.
“Nuk kam asgjë për të thënë për çështjen “Doshi”. U qëndroj deklaratave që kam dhënë. Nuk kam për të dhënë shpjegime të tjera”, mësohet të jetë përgjigjur deputeti Frroku ndaj pyetjeve.
Prej dy ditësh, deputeti Mark Frroku ndodhet në spital për shkak se ka shfaqur probleme shëndetësore. Deputeti ka lënë paraburgimin për tu shtruar në spital, pasi sipas avokatëve gjendja e tij shëndetësore është e rënduar. Sipas avokatëve Mark Frroku do t’i nënshtrohet një ndërhyrjeje në zemër.