Banka Qendrore s’ka parashikim për rritjen e 2015

Guvernatori i Bankës së Shqipërisë, Genti Sejko, deklaroi se rritja vjetore për 2014 ka qenë 1.9 % dhe se ky ngadalësim i përkohshëm i rritjes ekonomike në muajt e parë të 2015 ishte për shkak të përmbytjeve. Por ndërkohë ai nuk dha asnjë parashikim të bankës Qendrore për rritjen ekonomike të Shqipërisë në 2015.
Ai vijoi: “Pavarësisht sa më sipër, viti 2015 parashikohet të regjistrojë një rritje ekonomike më të lartë se ai i kaluar. Aktiviteti ekonomik pritet të mbështetet nga forcimi i konsumit dhe i investimeve private, të cilat do të ndihmohen nga kushtet monetare stimuluese dhe nga rritja e oreksit për rrezik në tregjet financiare. Gjithashtu, buxheti dhe planet fiskale të vitit 2015 parashikojnë një intensitet më të vogël konsolidimi fiskal, çka po vihet re tashmë në ecurinë e treguesve buxhetorë të tremujorit të parë. Tabloja e mësipërme pritet të ruhet edhe në vitet në vazhdim. Përmirësimet e pritura në aktivitetin ekonomik do të zbusin gradualisht hendekun negativ të prodhimit, duke ndihmuar mbylljen e tij në vitin e ardhshëm.”
Deri tani FMN dhe BB parashikojnë një rritje ekonomike që nuk i kalon 2.2%.
Në mbledhjen e Bordit të bankës u emërua Natasha Ahmetaj në funksionin e Zëvendësguvernatorit të Dytë të Bankës së Shqipërisë. Natasha ka eksperiencësi bankiere. Më parë ajo ka punuar tek BKT.