Meta mesazh Ramës nga Peza: Shqiptarët u lodhën me deputetë kriminelë e trafikantë

Kreu Kuvendit, njëherazi edhe kryetari i LSI-së, Ilir Meta në një aktivitet të LRI-së në Pezë i ka dërguar një mesazh aleatit të tij qeverisës, kryeministrit Edi Rama. Duke ju drejtuar të rinjve të pranishëm se LSI i ka mbështetur në problemet e tyre, kujtojmë protestat që shkaktoi reforma në arsim, deklaroi edhe se të rinjtë janë lodhur duke dëgjuar çdo ditë deputetë që dalin kriminelë nëpër Europë.
Kryeparlamentari tha se në Kuvend duhet të ketë më shumë të rinj dhe jo deputetë të dënuar për trafik e prostitucion.
“Organizoni sa më shumë festa të tilla. Ne jemi krenarë që në zgjedhjet e fundit lokale në Tiranë, ne kishim kaq shumë kandidatë të rinj. Tani kemi zgjedhjet e 18 qershorit, duam një mbështetje nga gjimnazistët dhe të rinjtë e Tiranës, jo vetëm për LSI që ka mbrojtur të drejtat e maturantëve, studentëve, por duam sa më shumë mbështetje që sa më shumë të rinj dhe të reja të jenë në parlament.
U lodhën shqiptarët duke dëgjuar se edhe ky deputet doli me rekorde kriminale se edhe ky deputet qenka marrë me trafik prostitucioni në Itali, apo Zvicër”, u shpreh Ilir Meta për të rinjtë e partisë së tij.