FIFA, pas skandalit botërorët e Rusisë e Katarit mund të anulohen

Anulimi i organizimit të Botërorëve 2018 dhe 2022 përkatësisht në Rusi dhe Katar do të jetë kushti kryesor për zgjedhjen e presidentit të ri të FIFA-s në marsin e vitit të ardhshëm.
Qeveria botërore e futbollit pranoi pak ditë më parë se votimi i këtyre dy vendeve për të pritur kompeticionin më të rëndësishëm të këtij sporti kishin motive politike.
Por hetimet po tregojnë se arsyet ishin të tjera, më saktë korruptive dhe zërat se votat janë blerë po vërtetohen me kalimin e ditëve.
Për këtë arsye, sipas mediave ndërkombëtare, federatat më të mëdha të botës do të bëjnë presion për anulimin e Botërorëve në Rusi dhe Katar.
Gjithsesi dy turnetë e ardhshëm nuk janë të vetmit të inkriminuar.
Ish-menaxheri i FIFA-s, Çak Blazer, i cili ishte njeriu që furnizoi me dokumente FBI-në ka bërë të ditur se ka marrë ryshfet edhe për organizimin e Botërorit 1998 në Francë dhe atij të vitit 2010 që u zhvillua në Afrikën e Jugut.
Të gjitha këto pritet të konfirmohen edhe nga Xhek Uorner, ish-president i Konfederatës së Amerikës Qendrore dhe Veriore dhe ish-zëvendëspresident i FIFA-s.
I arrestuar nga FBI dhe më pas i lënë në gjendje të lirë me kusht, Uorner ka bërë të ditur se do të nxjerrë të gjitha sekretet edhe pse për këtë rrezikon edhe jetën.
Dëshmia e Uorner do të jetë deçizive edhe në zbardhjen e arsyes së dorëheqjes së Sep Blater, pasi siç tha ai “zvicerani e di se përse u rrëzua”.