Amazon.com merr patentë për shpërndarjen e pakove me dron

Amazon.com, kompania më e madhe e shitjes së produkteve në internet me bazë në SHBA, ka marrë një patentë për sistemin e saj të planifikuar të dërgimit të pakove me dron (avionë pa pilot). Në mars rregullatorët federalë miratuan kërkesën e kompanisë Amazon për të filluar testimin e teknologjisë së re. Por siç njofton korrespondenti i Zërit të Amerikës, George Putic, shërbimi i ri ende do kohë për t’u realizuar.
Sipas kërkesës për patentë të publikuar nga Zyra Amerikane e Patentave, Amazon planifikon të përdorë Sistemin Global të Navigimit, GPS, jo vetëm për dërgesa nëpër shtëpi në mbarë vendin, por edhe direkt te blerësit, kudo që ata mund të jenë.
Duke u përqëndruar në vendndodhjen e celularit të klientit, droni (avioni pa pilot) do të jetë në gjendje të shmangë pengesat, të identifikojë një vend të sigurt për ulje dhe t’i dërgojë pakot brenda 30 minutave.
Për arsye sigurie, Administrata Federale e Aviacionit kërkon që donët (avionët pa pilot) në këtë periudhë eksperimentale të jenë brenda një distance në të cilën mund të shihen nga operatorët e tyre, duke e kufizuar shumë fushën e tyre të veprimit.