Në një deklaratë të Këshillit Ekzekutiv të Konferencës Gjyqësore Kombëtare shprehet mosaprovimi ndaj deklaratës së një dite më parë të kryeministrit Rama i cili paralajmëroi stuhi në gjyqësor në vjeshtën që vjen.
“ Këshilli Ekzekutiv përcjell sërish shqetësimin e të gjithë gjyqtarëve të të gjitha niveleve, në lidhje me disa deklarata e qëndrime publike të ditëve të fundit, të cilat i drejtohen në masë e pa dallim të gjithë gjyqtarëve. Në vlerësimin e këtij këshilli këto deklarata përkeqësojnë imazhin e gjyqsorit dhe përbaltin misionin e punën e përditshme të gjyqtarëve.
Mendojmë se nuk është e drejtë që të identifikohet dhe të përgjithësohet puna dhe veprimtaria e trupës gjyqësore të Republikës së Shqipërisë, me akte të veçanta të cilat nuk përfaqësojnë në asnjë rast figurën dhe punën e përditshme të gjyqtarëve. Statistikat me te thjeshta gjyqesore tregojne qartesisht punen voluminoze, te pergjegjshme dhe serioze e cila realizohet cdo dite nga qindra gjyqtare te sistemit gjyqësor.
Këshilli Ekzekutiv u bën apel përfaqësuesve të institucioneve shtetërore, shoqërisë civile, organeve të medias, qytetarëve që të tregojnë maturi dhe vetëpërmbajtje në shfaqjen e opinioneve dhe qëndrimeve denigruese, fyese dhe negative ndaj gjyqësorit, të cilat dalin jashtë kufijve të një kritike të shëndoshë, dashamirëse dhe konstruktive” thuhet në deklaratën e Konferencës Gjyqësore që është edhe organi më i lartë i gjyqtarëve ne vend, prej të cilit buron edhe pjesa dërmuese e anëtarëve të KLD-së .
