PD krijon komision organizativ për 25-vjetorin e themelimit të saj

Partia Demokratike dhe grupimi “Dhjetor 90” vendosën sot krijimin e një komisioni organizativ për të përkujtuar 25-vjetorin e krijimit të kësaj partie. Pjesë e këtij komisioni do të jenë drejtues të Lëvizjes Studentore, ish-studentë, pedagogë, intelektualë, etj.
Përmes një njoftimi për shtyp, PD deklaron se kjo nismë për të ngritur komisionin ka për qëllim të risjellë në kujtesë të shoqërisë shqiptare ndryshimin historik të Shqipërisë, atë të rënies së komunizmit.
Në njoftimin për shtyp thuhet:
“25 vjetori i Lëvizjes Studentore, që u finalizua me legalizimin e pluralizmit politik dhe me lindjen e Partisë Demokratike, do të jetë  një moment i bashkimit të të gjithë protagonistëve të atyre ditëve historike, ku çdo qytetar protagonist qendror dhe periferik do ta ndjejë veten pjesë të atij ndryshimi të madh që ndau Shqipërinë nga diktatura më e egër e lindjes komuniste dhe e orientoi vendin drejt vlerave të  lirisë, drejt Europës”.
Në kudër të Ditës Kombëtare të Rinisë dhe atë të themelimit të PD, komisioni do të përgatisë kalendarin e aktiviteteve që do të zhvillohen në datat 8 dhe 11 dhjetor të vitit të ardhshëm.