Gratë shtatzëna dhe nënat e reja, 30 minuta pushim për çdo 3 orë punë
Me rregulloren e re për kushtet e punës, nënat e reja dhe gratë shtatzëna, do të kenë më shumë kohë pushim në ambientet e punës. Miratimi i kësaj rregulloreje synon të përcaktojë rregulla për mbrojtjen e shëndetit dhe sigurinë në punë të punëmarrëseve gra që janë shtatzëna dhe nëna të reja. Në rregulloren e mirartuar më 15 korrik “Për prezantimin e masave për sigurinë dhe shëndetin në punë të grave shtatzëna dhe nënave të reja”, parashikohet dhe koha e punës për këtë kategori. Në nënin 5 të rregullores thuhet se këto gra kanë të drejtë të bëjnë një pushim të paguar 30 minuta çdo 3 orë punë.
Dy pikat ku mbështetet kjo rregullore janë siguria dhe koha e punës
Siguria
Sipas rregullores , në nenin 3 të saj thuhet “Punëdhënësi vlerëson riskun specifik ndaj agjentëve, proceseve ose kushteve të punës, bazuar në natyrën, shkallën dhe kohëzgjatjen e ekspozimit në ndërmarrje ose në vendin e punës ku zhvillojnë aktivitetin punëmarrëset”. Nëpërmjet kësaj rregulloreje punëdhënësi vlerëson çdo risk për sigurinë ose shëndetin në punë dhe çdo efekt të mundshëm mbi shtatzëninë ose ushqyerjen me gji të fëmijës së punëmarrëses. Po ashtu, punëdhënësi duhet të marrë masat parandaluese dhe korrigjuese në rast se vlerësimi tregon ekzistencën e një risku për sigurinë apo shëndetin në punë, ose ndikimi mbi shtatzëninë apo ushqyerjen me gji të fëmijës së punëmarrëses.
Koha e punës
Në nenin 5 të rregullores, përcaktohen disa kushte dhe favorizime për gratë shtatzëna, nënat e reja që kanë fëmijë deri në 1 vjeç dhe ato që kanë fëmijë në gji. Këto punëmarrëse kanë të drejtë të bëjnë pushim të paguar, jo më pak se 30 minuta çdo tri orë pune të vazhdueshme gjatë ditës. Po ashtu në një tjetër pikë përcaktohet se në përputhje me legjislacionin në fuqi, ato kanë të drejtë për leje të pagueshme nga puna për kryerjen e vizitave mjekësore, kur këto janë të nevojshme të kryhen gjatë orarit të punës.
