Ekspertët e Partisë Demokratike po punojnë intensivisht këto ditë mënyrë që në fillim të shtatorit të paraqesin amandamentet kushtetuese dhe ligjore për procesin e dekriminalizimit.
Paketa e dekriminalizimit do t’i paraqitet komisionit parlamentar të drejtësisë, dhe synimi kryesor që vetë Partia Demokratike ka shprehur se synon të arrijë është pastrimi i politikës dhe administratës shqiptare, në çdo nivel të saj nga personat me rekorde kriminale. Kjo paketë kushtetuese dhe ligjore e cila bazohet në raportin e Komisionit të Venecias u prezantua fillimisht në korrik. Por kjo paketë, përfshin edhe disa rrethana të tjera për përjashtimin e personave me rekorde kriminale, në mënyrë që t’i përshtatet realitetit shqiptar.
Paketa e dekriminalizimit e propozuar nga PD e cila do të prezantohet në shtator përfshin edhe një koncept tjerër, atë të përjashtimit nga zgjedhja në poste publike e personave të dëbuar jashtë vendit si të dyshuar për kryerjen e disa veprave penale.
Me paketën e saj të reformës në drejtësi, e cila cilësohet nga PD “severino plus”, hap rrugë ndryshimeve të mëdha kushtetuese. Me ndryshimet në ligjin për përzgjedhjen e deputetëve dhe zyrtarëve publikë, miratimi i ndryshimeve që propozon PD, ndërpret mandatet e atyre që kanë të shkuar kriminale brenda dhe jashtë Shqipërisë, si edhe ndalon edhe zgjedhjen e tyre në të ardhmen.
