Flutura Açka reagon: Do shkoj në gjyq me Gjergj Lekën, mbrojta një kauzë

Shkrimtarja Flutura Açka ka reaguar lidhur me padinë që Gjergj Leka do të ngrejë kundër saj. Ajo shprehet se fjalët që ka thënë në postimin e saj në Fb, nuk kanë lidhje me personin e Gjergj Lekës, por me fenomenin e ndëshkueshmërisë.
“Dëgjova sot se z. Leka ka vendosur të më hedhë në gjyq, e drejtë e tij, megjithëse përsëris sot e gjithë ditë, se fjalët e mia nuk kanë lidhje me personin e tij, por me fenomenin e radhës së padrejtë në ndërshkueshmërinë shqiptare. E përsëris se ka qenë një fat i madh që gra artiste, edhe në kushte të një terrori të tillë në diktaturë, me jetën e tyre (ndokund edhe me gabime), me përpjekjet e tyre kanë sjellë regëtime drite, ndryshime, shprese dhe emancipimi”-shkruan Açka.
Ajo thotë se nuk ka bërë asgjë tjetër veçse ka mbrojtur dhe respektuar lirinë e femrës shqiptare, e nëse shkon në burg, do ta bëjë me kënaqësi, sepse po shkon për një kauzë.
“Nëse z. Leka më sheh si fajtore për fajin e tij, dhe do të paguajë para për të qenë më pak i fajshëm, unë do të mbrohem falas dhe publikisht, sepse nuk kam bërë asgjë, veç kam vënë një gur në bankinën e madhe të mbrojtjes dhe respektimit të lirisë së femrës shqiptare, detyrë që e ka secili prej nesh. Nëse ky është faj, shkoj me kënaqësi në burg, sepse fundja shkoj për një kauzë”- përgjigjet Açka.