Anishah Vlora, vajza e Eqerem Bej Vlores, sjell dëshmi tronditëse nga jeta e saj dhe nënës, gruas së Eqerem Bej Vlorës gjatë periudhës së komunizmit. Ajo thotë se u plaçkitën e u përndoqën edhe pse babai i saj ishte njeriu që hodhi themelet e shtetit shqiptar. Eqerem Bej Vlora e la vajzën e tij 9 muajshe kur u largua nga Shqipëria menjëherë pas akuzave të qeverisë së re komuniste se bashkëpunoi me pushtuesit italianë.
Një një intervistë për gazetarin Roland Qafoku në emisionin “Debati në Channel One”, Anishah përgjigjet: Babai nuk ishte tradhtar. Ai njeri ka bërë albanologjinë kombëtare e si mund të jetë tradhtar? Si mund të quhet tradhtar dikush që ka hedhur themelet e shtetit”.
Ritregon atë që ka dëgjuar nga nëna e saj për largimin e të atit nga vendi ne 1944, i cili iku me premtimin për marrë por që nuk mundi kurrë dhe dështoi tre here në tentativat e tij. “Kur babai u largua nga shtëpia, që nga ajo ditë filluan vuajtjet tona. Na nxorën nga shtëpia e hallës sime, duke lënë plaçkën të gjithë. E dolëm në rrugë vetëm me rrobat e trupit. Vajtëm në Babrru, ishte një mikeshë e nënës. Po atje na diktuan, e na çuan në Durrës. E aty na ndoqën. Shkuam në Rrogozhinë, në fshatrat e Kavajës. Çdo bënte një grua me dy fëmijë jetim? Megjithatë nëna ime u bë e forte. Jetuam duke shitur plaçkat që sillte im atë. Me emrat e dy shoqeve të nënës dërgonte rreth 10 dollarë. Më shume na sillte rroba. Jetuam në vështirësi të mëdha, në borxhe.”- tregon Anishah Vlora.
Vdekjen e babait e morën vesh nga Hëna Këlcyra, vajza e tezes së saj: “ E morëm telegram dhe e lexonim. Lotët prishin gërmat e letrës të shkruar me bojë. Nuk bënim dot kërkesë për në Vjenë, nga frika.”- vazhdon më tej Anishah Vlora. Më tej në narracionin e saj dramatik Anishah Vlora e bindur se drama e saj kishte autor Enver Hoxha dhe regjimin komunist, të habit me përgjigjen ndaj pyetjes së gazetarit Qafoku.
-Çfare do t’i thonit Enver Hoxhës?
-Do ta nderonim e nuk do t’i thonim asgjë. Asnjë hakmarrje nuk patëm e nuk do të kemi. Jemi gjaku i babait tim, e ai nuk bënte të liga por vetëm të mira. Ai nuk i bënte keq njeriu edhe nëse e kishte hasëm.
Eshtrat e Eqerem Bej Vlorës prehen ne Shqipëri pas një vendimi të qeverise në 5 mars 2014.
Personaliteti i shquar shqiptar vdiq në Vjenë në vitin 1964 .
