Presidenti Nishani priti sot me një ceremoni zyrtare Presidenten e Kosovës, Atifete Jahjaga, e cila po zhvillon një vizitë shtetërore me ftesë të Kreut të Shtetit shqiptar.
Gjatë takimit të dy delegacionet zyrtare patën mundësinë që, në frymë vëllazërore dhe vizion euro-atlantik, të vlerësojmë marrëdhëniet e shkëlqyera e vëllazërore që ekzistojnë mes dy shteteve, si dhe të analizojnë hapësirat politike të këtij bashkëpunimi në nivel dypalësh, rajonal dhe ndërkombëtar.
Presidenti Nishani duke folur në një konferencë të përbashkët për shtyp me homologen nga Kosova tha se Shqipëria dhe Kosova kanë nënshkruar mbi 80 marrëveshje e protokolle bashkëpunimi, por duhet bërë çdo përpjekje për zbatimin e tyre të plotë, duke u bërë model i bashkëpunimit dypalësh në rajon.
“Ne do të vazhdojmë të jemi në mbështetje të biznesit të dy shteteve për të krijuar një treg të hapur dhe pa barriera burokratike, të qëndrueshëm dhe të aftë për konkurruar në një të ardhme jo të largët edhe vetë brenda tregut të Bashkimit Evropian”, tha Presidenti Nishani.
Presidenti shqiptar theksoi se sëbashku me Presidenten Jahjaga kanë vlerësuar dy takimet e përbashkëta të Qeverive të dy shteteve tona, fillimisht në Prizren dhe më pas në Tiranë, të cilat kanë evidentuar problematikat dhe fushat me interes të bashkëpunimit.
Gjatë takimit është biseduar me interes edhe për protokollet e nënshkruara dhe shkëmbimet arsimore dhe kulturore, të cilat janë dy fushat që i lejojnë kombit shqiptar të ruajë dhe të promovojë në mënyrë të unifikuar, vlerat historike dhe kulturore të tij dhe ta trashëgojë ato në brezat që vijnë. Unifikimi i programeve kulturore dhe kurrikulës së sistemit arsimor parauniversitar janë hapa shumë të rëndësishëm në këtë drejtim, tha Presidenti Nishani.
Presidenti shqiptar deklaroi se Shqipëria e mirëpriti dhe mbështeti krijimin e Gjykatës Speciale për hetimin e pretendimeve për krime lufte në Kosovë, por se asgjë dhe askush nuk e eklipson apo tjetërson dot luftën heroike të Ushtrisë Çlirimtare të Kosovës në përballjen me agresionin dhe gjenocidin çnjerëzor millosheviçian mbi baza etnike të ushtruar mbi popullin e Kosovës.
