Bizneset që nuk paguajnë detyrimet fiskale do të përballen me masa shtrënguese, të cilat shkojnë deri në sekuestrimin të xhiros ditore.
Në nenin 11 të projektligjit, që është depozituar në Kuvend, propozohet një masë e re shtrënguese e mbledhjes së borxheve tatimore.
Në pikën 2 të nenit 89 përcaktohet se, “nëse tatimpaguesi nuk përdor të drejtën e ankimit dhe nuk paguan detyrimin tatimor, administrata tatimore duhet ta mbledhë tatimin, duke përdorur njërën ose disa prej mënyrave të parashikuara në këtë draft”.
Sekuestrimi
Në këtë projektligj propozohet që, në funksion të mbledhjes së detyrimit tatimor të papaguar të tatimpaguesit, administrata tatimore mund të angazhojë strukturat e saj për të verifikuar dhe monitoruar në vend aktivitetin tregtar të tatimpaguesit, me qëllim konfiskimin në fund të çdo dite të një shume jo më pak se 50% të qarkullimit të realizuar, por jo më shumë se detyrimi tatimor për të cilin ka filluar procedura e mbledhjes me forcë të detyrimeve tatimore, për llogari të detyrimeve tatimore të pashlyera të tatimpaguesit.
“Tatimpaguesi për të cilin administrata tatimore ka filluar mbledhjen me forcë të detyrimeve tatimore të papaguara, nuk mund të kryejë transferim të shumave të parave nga llogaria e tij apo të shesëtë transferojë aktivet ose kapitalet e shoqërisë”,- thuhet në projektligj.
Në rastin kur një tatimpagues ka detyrime tatimore të papaguara, ndaj administratës tatimore dhe ndërkohë ka detyrime kontraktuale të pambledhura nga një palë e tretë, administrata tatimore ka të drejtë t’i kërkojë njëkohësisht palës së tretë (e cila i ka borxh tatimpaguesit) që të bëjë pagesën për tatimpaguesin.
Gjobat
Të gjitha bizneset, të cilat nuk i paguajnë në afat këstet e tatimit mbi fitimin ose tatimit të thjeshtuar mbi fitimin kanë një masë penaliteti 15%, aq sa edhe tatimi mbi fitimin.
Sipas projektligjit, për tatimpaguesit e regjistruar si subjekte të tatimit mbi vlerën e shtuar dhe tatimit mbi fitimin do jetë me gjobë prej 500 000 lekësh dhe për tatimpaguesit e tjerë do jetë me gjobë prej 50.000 lekësh.
Për çdo konstatim të përsëritur të mosdeklarimit të punonjësve, pas aplikimit të masës së gjobës, shkelja konsiderohet evazion tatimor.
Në ndryshimin e propozuar është standardizuar masa e gjobës në 500 mijë lekë për çdo punonjës të padeklaruar, pavarësisht se tatimpaguesi është subjekt i TVSHsë dhe tatimfitimit apo jo.
Kjo për arsye se shkelja tatimore – mosdeklarimi i punonjësit, shfrytëzimi i krahut të punës, duhet të dënohet njësoj. gazeta shqiptare
