Ministri i Mirëqenies Sociale dhe Rinisë, Blendi Klosi, dhe Sekretari i Shtetit gjerman, Jorg Asmussen kanë nënshkruar sot në Tiranë marrëveshjen e cila mundëson njohjen e periudhave të punës dhe kontributeve të sigurimeve shoqërore për efekt të përllogaritjes së pensioneve.
Me hyrjen në fuqi të marrëveshjes qytetarët shqiptarë shqiptarë që jetojnë në Gjermani dhe anasjelltas do kenë mundësi të përfitojnë njohjen e viteve të punës dhe të kontributeve të sigurimeve shoqërore, si në përllogaritjen e pensioneve, ashtu edhe në përfitimin e shërbimeve të tjera sociale.
“Kjo është një ditë shumë e gëzuar për të gjithë emigrantët shqiptar në Gjermani, apo ata që kanë punuar në Gjermani dhe tani janë kthyer në Shqipëri, pasi nëpërmjet kësaj marrëveshjeje ne iu japim atyre të drejtën që këto pensione të njihen në të dyja vendet dhe vitet e punës të mos humbasin”, tha Klosi.
Gjithashtu, ai bëri të ditur se marrëveshja konsiston në ofrimin e përfitimeve në sigurimet shoqërore dhe bazohet në parimin e trajtimit të barabartë të punëtorëve në punësim, trajtimin me përfitime dhe të ardhura.
Nga ana e tij Asmussen ka theksuar kjo marrëveshje në terma më konkretë ka të bëjë fillimisht me përllogaritjen e të gjitha periudhave të sigurimit social të punëmarrësve, qofshin këta gjermanë apo shqiptarë. “E thënë në terma më konkretë, nëse një punëmarrës shqiptar apo punëmarrës gjerman punon për një periudhë 5- vjeçare, 2 prej tyre në Gjermani dhe 3 prej tyre në Shqipëri, periudhat e sigurimeve shoqërore do të kenë mundësi të llogariten në pretendimet e tij për pension”, tha Asmussen.
