Drejtoria e Policisë Qarkut Elbasan, ka marrë një sërë masash organizative në drejtim të sigurimit të rendit dhe qetësisë, për zhvillimin sa më normal të ndeshjes Shqipëri – Serbi, e cila do të zhvillohet më datë 08. 10. 2015, në orën 20:45, në Stadiumin “Elbasan Arena”.
Bëhet me dije se hyrja e sportdashësve do të fillojë në orën 16:30 dhe do të mbarojë në orën 20:15, me qëllim shmangien e radhëve të gjata në hyrje për në Stadium.
Lidhur me ndeshjen do të angazhohen 1500 punonjës policie, nga këto 308 punonjës policie do të jenë nga Drejtoria e Policisë Qarkut Elbasan.
Rrugët dhe parkimet e bllokuara
Policia e Elbasanit sqaron në orën 08:00, të datës 08. 10. 2015, do të bllokohen disa segmente rrugore si dhe do të ndalohet qarkullimi i mjeteve në këto akse rrugore:
Bulevardi “Qemal Stafa” që fillon nga Posta deri në dalje të unazës për në Librazhd.
Bulevardi “Aqif Pasha”, që fillon nga “1 Maji” deri tek ish-konservimi i vjetër.
Nga ish-konservimi i vjetër deri tek “Harullajt”
Nuk do të lejohet parkimi i mjeteve nga rrethrrotullimi i luleve deri te rrethrrotullimi i Zaranikës.
Nuk do të lejohet parkimi i automjeteve përreth dhe përballë stadiumit.
Nuk do të lejohet lëvizja dhe parkimi i mjeteve në dy Bulevardet Kryesorë.
Këshilla për sportdashësit në Stadium
Nuk do të lejohet marrja e fëmijëve të mitur pa u pajisur me biletë
Të gjithë sportdashësit që do të marrin pjesë në këtë aktivitet, të jenë të pajisur me kartë identiteti dhe të mos kenë me vete:
a) sende të forta.
b) shishe (të çfarëdolloj).
c) fishekzjarrë.
d) monedha apo metale (të çfarëdolloj).
Në të kundërt NUK do të lejohen të futen në stadium.
Në hyrje të stadiumit do të kontrollohen të gjithë sportdashësit.
Këshilla për qytetarët
Të gjitha lokalet që ndodhen në Bulevardin “Aqif Pasha”, nga Stadiumi deri te Shatërvani, nga ora 12:00 dhe deri në përfundim të ndeshjes do të jenë të mbyllura.
Në të gjitha ballkonet, ambientet dhe pallatet përreth Stadiumit, nuk do të lejohen persona që nuk janë pjesëtarë të familjes.
Drejtoria Policisë Elbasan i kërkon qytetarëve që të minimizojnë më datë 8 Tetor 2015, lëvizjen e tyre me automjet brenda qytetit të Elbasanit, çka do të sillte një ndihmesë të madhe në zhvillimin sa më normal të këtij aktiviteti.
