Seanca e radhës ndaj të vetëshpallurve imamë, që akuzohen nga drejtësia shqiptare për terrorizëm dhe për lidhjet e tyre me ISIS- në Siri dhe Irak, është shoqëruar me tensione dhe debate të ashpra mes të pandehurve, prokurorit të çështjes dhe trupës së gjyqtarëve.
Gjithçka ka nisur me refuzimin e të pandehurit Bujar Hysa të avokatëve të caktuar nga lista kryesisht prej gjykatës.
I pandehuri Hysa ka replikuar ashpër me prokurorin e çështjes, ndërkohë që nuk kanë munguar as kërcënimet e tij në adresë të kryesueses së trupës së gjyqtarëve.
“Do të vijë radha edhe ty”, i është drejtuar gjykatëses së çështjes ai.
Pas këtij momenti, gjykata vendosi nxjerrjen jashtë të të pandehurit Hysa dhe shtyrjen e seancës.
Edhe seanca e mëparshme, e mbajtur në muajin shtator, dështoi për shkak të tensioneve të tilla. Të vetëshpallurit imamë akuzohen për terrorizëm. Ata vepronin jashtë Komunitetit Mysliman Shqiptar në atë që njihet si xhamia e Unazës së Re.
