Basha: Nuk ka ndryshime në qeveri me hiq Naço e vër Paço

Kreu i PD-së, Lulzim Basha e ka parë me skepticizëm ndryshimin e sotëm në ministrinë e Drejtësisë. Sipas Bashës, “nuk ka ndryshime në qeveri. Nuk është ndryshim, Naço e Paço” 
“Nuk ka ndryshime në qeveri. Të flasësh për Naço e Paço kur shqiptarët nuk kanë bukë për tu dhënë fëmijëve është një tallje e papranueshme. Nuk ka ndryshime në qeveri. Ndryshimi në qeveri që presin shqiptarët është largimi i shkaktarit të varfërisë, depresionit, gjendjes ku ndodhen sot”, tha Basha, në një deklarim për mediat nga selia e PD-së, para fillimit të një takimi të zgjeruar të kryesisë së kësaj partie me drejtues të departamenteve, ku do të diskutohet gjerësisht platforma ekonomike e Partisë Demokratike, Basha tha se kjo platformë synon lehtësira që do të bëjnë të mundur rikthimin e shpresës dhe optimizmit.
“Ne bëhemi gati tu ofrojmë shqiptarëve një rrugë tjetër. Do të prodhojë më shumë mirëqenie për shqiptarët. Platforma jonë është në kontrast të plotë me hapat që ka ndërmarrë qeveria Rama. Rënien e xhiros, rënien e lekut, rënien e mirëqenies së shqiptarëve. Në vend që të reflektojë për kursin e gabuar, çfarë bën, sjell në parlament ligje për burgosjen e biznesit, dhe paketa për rritjen e taksave për shqiptarët”, deklaroi Basha.
Sipas kreut të PD-së, kësaj qeverie i mungojnë 1 milionë dollarë në ditë dhe askush nuk jep përgjigje.
“Rama nuk ka dhënë përgjigje përse i mungojnë miliona euro, presim të zbardhet shifra. Në kulmin e aksionit kundër informalitetit qeverisë i mungojnë 1 milionë dollarë në ditë. Është fatura e korrupsionit, vjedhjes, në sektorin e naftës, cigareve, mallrave të akcizës. Paratë vidhen ditën për diell dhe natën me hënë nga xhepat e shqiptarëve”, deklaroi Basha.