Presidenti amerikan Barack Obama takim privat me presidentin rus Vladimir Putin

Presidenti amerikan Barack Obama ka premtuar dyfishimin e kapaciteteve luftarake kundër ISIS’it, teksafoli në samitin e G20-es, pas një takimi me homologun e tij turk Rexhep Tajip Erdogan.
“Ne do të dyfishojmë përpjekjet tona të punës me anëtarët e tjerë të koalicionit për të sjellë një tranzicion paqësor në Siri dhe për të eliminuar ISIS si një forcë që mund të krijojë kaq shumë dhimbje dhe vuajtje për njerëzit në Paris dhe Ankara dhe pjesë të tjera të globit” ka thënë ai.
Presidenti amerikan Barak Obama tha se Republika e Turqisë është një aleat i rëndësishëm i Shteteve të Bashkuara dhe gjithë koalicionit ndërkombëtar në luftën kundër ISIS’it në Irak dhe Siri.
“Sulmet e tmerrshme terroriste më parë në Ankara dhe tani në Paris, janë vepër e ideologjive të së keqes dhe nuk janë sulme vetëm ndaj popujve të Turqisë dhe Francës, por gjithë botës moderne”, tha Obama.
Presidenti amerikan Obama theksoi se diskutimi i sotëm ishte i rëndësishëm për të forcuar më shumë kontrollet në kufirin turk me Sirinë që të parandalohet lëvizja e luftëtarëve të huaj. Në kuadër të axhendës së Samitit të G20, Obama sontë do të takojë mbretin e Arabisë Saudite, Selman bin Abdulaziz Al-suud.
Presidenti Obama është takuar gjithashtu edhe me presidentin rus Vladimir Putin, dhe BBC raporton se ata kanë zhvilluar një bisedë private në margjinat e Samitit të G20-ës në Turqi. Takimi zgjati rreth 15 minuta.