“E premtja e zezë”, rekord shitjesh armësh në SHBA – më shumë se 185 mijë blerje brenda një dite

Shitje rekord armësh në Shtetet e Bashkuara të Amerikës ka pasur dje, e konsideruar si “e premtja e zezë”. Sipas të dhënave zyrtare të FBI-së e cila po bën verifikimet për ata që kanë blerë armë, bëhet e ditur se janë shitur më shumë se 185 mijë armë në një ditë në të gjithë vendin. Kjo shifër është 5 për qind më shumë amerikanë se një vit më parë kanë preferuar të blejnë armë.
Për të blerë një armë në Shtete e Bashkuara të Amerikës duhet të paraqesësh një dokument që përmban të dhëna personale dhe verifikimin që nuk ke precedentë penalë. Numri i certifikatave të kontrolluara nga policia federale, një në çdo dy sekonda, nuk korrespondon me armët e shitura, që janë më shumë.
Xhon Vernik përgjegjës i qendrës për parandalimin e dhunës në lidhje me armët e zjarrit u shpreh se rreth 40 për qind e blerjeve bëhet nga shitës jo të autorizuar. Në vitin 2015, numri i verifikimeve për ata që duan të blejnë armë ka shënuar rekorde të reja çdo muaj, vetëm në tetor ishin plot 1.9 milionë amerikanë të cilët dëshironin të blinin armë, të dhëna këto që i japin të drejtë presidentit amerikan Barak Obama i cili u shpreh pas masakrës së fundit në San Bernardino se Frekuenca e të vrasjeve në masë me armë zjarri në vend nuk ka asnjë paralele me pjesën tjetër të botës.
Obama u shpreh se dhe pse ekzistonte një listë me personat që nuk mund të fluturojnë, po këta persona nga ana tjetër mund të hyjnë në çdo dyqan dhe të blejnë një armë zjarri.