Ylli Manjani “nuk ju ndahet” drejtorëve të burgjeve, shkarkon edhe atë të Sarandës

Ylli Manjani, ministri i ri i Drejtësisë, “nuk po u ndahet” drejtorëve të burgjeve. Me urdhër të tij sot u shkarkua sot nga detyra Drejtori i IEVP Sarandë, Arqile Vaso. Shkarkimi i tij, mësohet se është bërë me motivacionin mospërmbushje të detyrave funksionale dhe menaxhim jo të duhur të burimeve njerëzore.
Masa është marrë pas disa inspektimeve në këtë institucion, ku janë gjetur shkelje të përsëritura dhe nuk janë reflektuar detyrat e lëna nga grupi i inspektimit të Drejtorisë së përgjithshme të Burgjeve.
Shkarkimi i sotëm i kryegardianit të Sarandës, nuk është i vetmi, që prej marrjes së detyrës së ministrit të Drejtësisë, nga Ylli Manjani.
Pak ditë më parë, ministri i Drejtësisë, Ylli Manjani, shkarkoi nga detyra, një tjetër drejtor, atë të burgut të Korçës, Laert Çeliku. Edhe shkarkimi i tij u bë pas një inspektimi të kryer në IEVP-në e Korçës, ku janë konstatuar disa shkelje.
Një tjetër drejtor burgu kishte fatin e Laert Çelikut. Këtë herë ishte Avni Sula, drejtori i Burgut të Bënçës, i cili u shkarkua pas inspektimit të kryer së fundmi në këtë institucion dhe shkeljeve në detyre të kryera nga ana e tij.
Shkarkimeve të drejtorëve të burgjeve, nuk i kanë munguar edhe dorëheqjet.
Një e tillë është ajo e ish-drejtorit të Burgut 313, i cili dha dorëheqjen nga kjo detyrë. Dorëheqja e Saimir Allushit erdhi pas publikimit në media, i një vendimi gjykate që e kishte dënuar atë me burg, në vitin 1994.