Makinat që janë prodhuar para viti 2002 mund të ndalohen të qarkullojnë në Shqipëri për shkak të normës së lartë të emetimit të gazrave.
Vendimi vjen pas marrëveshjes së Parisit për uljen e temperaturës së globit me 2 gradë dhe kufizimi i gazrave të makinave është i vetmi moment që prek Shqipërinë.
“Ministria e Transportit së bashku me Ministrinë e Mjedisit, po merr masa konkrete që Shqipëria të jetë në të njëjtën linjë me kushtet e BE-së, për sa i përket qarkullimit të automjeteve Euro5”, tha ministri Lefter Koka, gjatë një konference për shtyp.
Nga ky ndryshim preken të gjitha makinat pas viteve 1986 deri në vitin 2002.
Direktivat e Bashkimit Europian parashikojnë se makinat e këtyre viteve kanë nivel të lartë të shkarkimit të gazrave dhe nuk mund të qarkullojnë. Sipas Ministrisë së Mjedisit në Shqipëri aktualisht ka një udhëzim për sa i përket shkarkimit të gazrave por që ende nuk është zbatuar sipas direktivave të BE-së.
Niveli i gazrave
Nga data 1 Korrik 2015, drejtuesit e automjeteve që do të bëjnë kolaudimin duhet të plotësojnë normat e rritura të shkarkimit të gazrave që variojnë nga 10 për qind për automjetet e vitit 1986 deri në 60 për qind për automjetet e vitit 2002, shkruan shqiptarja.com.
“Qytetarët mund të shikojnë vlerat aktuale të automjetit të tyre në certefikatën e kontrollit teknik të kryer një vit më parë, dhe nëse ato rezultojnë më të ulta se normat e përcaktuara nga Ministria e Transporteve, duhet ti normalizojnë ato. Deri tani nuk e kalon testin kur treguesit mesatarë të matjeve të gazrave të shkarkimit të motorit janë më të larta se 2.5 m-1 në rastet e motorëve diezel me aspirim normal dhe 3.0 m-1 në rastet e motorëve diezel turbo. Nga 1 janari deri 30 qershor 2016, normës së BE-së i shtohet vetëm 1/2 përqindjes së aplikuar gjatë gjashtëmujorit paraardhës”, – thuhet në udhëzimin e Ministrisë së Transporteve.
