Ambasadori Gjerman në Tiranë, Hoffman ka reaguar shkurt sot ndaj akuzave të djeshme të ish-kryeministrit Berisha duke krahasuar shkëmbimet e ashpra mes tyre me polemikat që Berisha kishte me drejtuesen e misionit të vëzhguesve të OSBE/ODHIR për zgjedhjet vendore Audrey Glover.
Në reagimin e tij të prerë e të shkurtër Ambasadori gjerman në Tiranë Helmut Hoffman i është përgjigjur Berishës në lidhje me qëndrimet e tij ndaj protestës së PD dhe ndaj zgjedhjeve të fundit lokale.
“Ambasadori Hoffman e konsideron si domethënës faktin që zoti Berisha ka sulmuar edhe drejtuesen e misionit të vëzhguesve të OSBE/ODHIR për zgjedhjet vendore Audrey Glover. Çdo koment tjetër do të ishte i tepërt nga ana e tij”.
Një ditë më parë Berisha akuzoi ashpër diplomatin gjerman, duke u shprehur se ai duhej të shqetësohej më shumë për zgjedhjet, sesa për bunkerin.
Andrey Glover drejtoi misionin e zgjedhjeve në Shqipëri më 2013, kur PD humbi zgjedhjet. Një koncidencë lidhet me emrin e saj. Ajo drejtoi misionin e vëzhguesve të huaj edhe në zgjedhjet parlamentare të vitit 1996, kur opozita e atëhershme, PS, bojkotoi votimet dhe vëzhguesit konsideruan se zgjedhjet u manipuluan në një numër të madh zonash zgjedhore.
