Ndërron jetë Sulo Gradeci, njeriu më i afërt i Enver Hoxhës për 30 vjet

Ndërron jetë në moshën 93-vjeçare, Sulo Gradeci, njeriu më i afërt i Enver Hoxhës për 30 vite.
Komandanti i grupit të shoqërimit të Enver Hoxhës, zyrtarisht deri në vitin 1983, vdiq rreth orës 21:00 të mbrëmjes, gati 1 javë pasi kishte humbur edhe të shoqen.
Sulo Gradeci lindi në vitin 1922 në Gradec, komuna Gjerbës të Skrapari. Mbiemri i tij ishte Dalipaj, por më vonë e zëvendësoi me emrin e fshatit ku lindi.
Më 28 tetor të vitit 1941, ai ka marrë pjesë në demonstratën antifashiste, kohë kur vetë ai ka treguar se është njohur me Enver Hoxhën. Më pas, në vitin 1942, Sulo Gradeci ishte efektiv i çetës së Skraparit dhe më vonë partizan i Brigadës VII. Më 22 gusht të vitit 1943, Sulo Gradeci bëhet anëtar i Partisë Komuniste. Pas një viti nisin gradimet e tij, fillimisht toger e deri nënkolonel.
Menjëherë pas çlirimit të Shqipërisë, ka punuar në Degën e Punëve të Brendshme në qytetin e Beratit dhe Elbasanit, si dhe në organet e Sigurimit të Shtetit. Në këto vite, Sulo Gradeci ka bërë specializim për sigurimin, fillimisht në Rumani e më pas në Bashkimin Sovjetik. Në vitin 1966 ai emërohet kryetar i grupit të shoqërimit të Enver Hoxhës, personi përgjegjës për ruajtjen e jetës së tij.