Axhenda parlamentare, Ilir Meta shtyn vizitën në Beograd

Kreu i Kuvendit Ilir Meta, ka shtyrë vizitën e tij në Serbi për shkak të axhendës së ngjeshur parlamentare. Vizita ishte planifikuar të niste sot dhe do të zgjaste 3 ditë, ndërsa kryeparlamentari Meta do të takohej me krerët e shtetit serb.
Ndërkohë, sot në seancën e fundit parlamentare do të diskutohen projektligji “Për amnistinë”, projektvendimi “Për miratimin e strukturës, organikës dhe kategorizimeve të pozicioneve të punës të Inspektoratit të Lartë të Deklarimit dhe Kontrollit të Pasurive dhe Konfliktit të Interesave” si dhe pritet të votohet projektligji “Për lojërat e fatit në Republikën e Shqipërisë”.
Pas kësaj seance, deputetët marrin pushimet e fundvitit, për t’u ritakuar sërish në mes të janarit.