Privatizimi i INSIG i paracaktuar për miqtë e Edi Ramës, Gon Papuli e Gaz Demi

PD ka denoncuar sot Edi Ramën, i cili ndërsa tregoi sot me gisht për një orë rresht popullin e tij si hajdut, në një sallë të mbushur me dhunë me punonjës administrate në orar zyrtar, ndërkohë ai vetë qëndron në krye të bandës që vjedh dhe gllabëron çdo ditë paratë dhe pasuritë e shqiptarëve.
“Së fundmi, Edi Rama ka futur në kthetrat e tij edhe një tjetër pasuri  publike, për ta ndarë me miqtë dhe klientelën. Kompania e sigurimeve INSIG, pritet të privatizohet dhe pronarët e rinj janë paracaktuar.
Procedurat do të jenë të kota e pa vlerë, pasi ky aset shtetëror me vlerë dhjetëra milionë euro, do ti jepet miqve të kryeministrit. Pronarët e rinj të INSIG pritet të jenë Gon Papuli dhe Gaz Demi. Njëri ndërtues i sarajeve private të Edi Ramës në Dardhë e në Durrës, tjetri me lidhje të forta e së fundmi në ortakëri me Olsi Ramën në biznes”, denoncoi në emër ët PD-së, zëdhënësja e kësaj partie, Ina Zhupa.
Për PD-në, ky është një skandal më shumë i Edi Ramës me pasuritë e shqiptarëve.
“Ky është një skandal, një akt korruptiv, me fitues të paracaktuar, pjesë e mendësisë së Edi Ramës për të marrë e plaçkitur, për të ndarë me miqtë çdo pasuri publike. Me dhjetëra koncesione e privatizime të kësaj natyre, po bëhen çdo ditë nga Edi Rama me pasuritë e paratë e shqiptarëve. Është koha, është ora që shqiptarët të reagojnë. Shqiptarët e kanë në dorë të ndalin këtë vjedhje, këtë babëzi, këtë hajdutëri të fondeve dhe pasurive publike”, përfundoi me një apel drejtuar shqiptarëve, deklaratën e saj, në emër të PD-së, zëdhënësja Ina Zhupa.