Si mund të takoni shpirtin tuaj binjak?

Ne takojmë vazhdimisht njerëz të rinj nga një mori të panjohurish. Cilët nga këta persona do të bëhen partnerët tanë romantikë dhe sa ndryshim përbën vendi ku i takojmë?
Përgjatë një dite mund të themi se ne përballemi me të paktën një person që nuk e kemi njohur më parë. Qoftë ky një shitës dyqani apo prezantimi i një miku të përbashkët, ne vazhdimisht ndërveprojmë me të panjohurit. Ne mbase nuk do t’i shohim kurrë sërish këta njerëz, por disa prej të panjohurve mund të bëhen miqtë tanë ose pse jo, të dashurit tanë.
Kërkimi i një partneri/e, nga ana tjetër, është një proces që jo për të gjithë shkon njëlloj. Uebsajtet e njohjeve online kanë treguar se nuk mund të mbështeteni te takimi i rastësishëm me të panjohurit për të gjetur një partner të mundshëm. Nëse jeni me fat, një kërkim sistematik virtual mund të prodhojë një njohje reale që pse jo, mund të përfundojë në dashuri.
Cila mënyrë në gjetjen e një partneri ju sjell rezultatin e dëshiruar? Ka pak të dhëna mbi këtë çështje, ndoshta për shkak se kërkuesit janë në gjendje të gjurmojnë vetëm çiftet që janë njohur fillimisht online.
Teori të vjetra e kundërshtuan idenë e ngjashmërisë me idenë të “kundërtat tërhiqen”, si mënyra më e mirë për të prodhuar një marrëdhënie të qëndrueshme. Të dyja teoritë e konsideronin afërsinë një plus: njerëzit që jetojnë pranë njëri-tjetrit shpesh kanë lidhjet më të rëndësishme për shkak të faktorëve që çojnë në krijimin e afërsisë dhe stabilitetit. Me fjalë të tjera, njerëzit që jetojnë në një lagje, për shembull, kanë më tepër gjasa të kenë një status social të njëjtë, të ardhura të ngjashme dhe ndoshta të njëjtën racë ose etni. Këta faktorë mund t’i bashkojnë njerëzit mbi baza sociologjike, por ndonjëherë gjithashtu i bashkojnë njerëzit për nga aspekti psikologjik.
Njohja e dashurisë
Në shekullin XX, shumica e çifteve njiheshin përmes familjarëve të tyre, por në vitet 1940, miqtë i shmangën pjesëtarët e familjes si ndërmjetësuesit e dashurisë. Megjithatë, pasi shifra u rrit nga 20 për qind në vitin 1940, në 40 për qind në vitin 1990, në vitet 2000 e në vazhdim, përqindja e miqve që bënin shkuesi shkoi në 30 për qind. Kjo ndodhi kryesisht për shkak të internetit, të cilin njerëzit po e përdorin për të gjetur personin e zemrës.
Në një anketim të kryer te 2373 amerikanë, një numër i konsiderueshëm i 18-34-vjeçarëve e njohën personin e tyre të zemrës nëpërmjet miqve të përbashkët, rreth 39 për qind. Kjo ishte më shumë sesa mënyrat e tjera si për shembull njohjet online. Rreth 22.3 për qind e të anketuarve thanë se e kishin njohur partnerin në ambiente sociale si lokale, qendra apo takime.
17.9 për qind e tyre thanë se ishin njohur në mjedisin e punës, ndërsa 9.1 për qind përmes uebsajteve të njohjeve online. Një shifër më e vogël, 5.8 për qind ishin njohur në rrjetet sociale, ndërsa 6 për qind në rrethana të tjera.
Të pyetur për marrëdhënien e krijuar së pari me personin e saponjohur, 40 për qind u përgjigjën se fillimisht kishin qenë miq platonikë, ndërsa 35 për qind e tyre thanë se ishin lidhur pas një serie takimesh. Ndërkohë, 24 për qind e të anketuarve u shprehën se e filluan flirtimin menjëherë.
Kërkimet tregojnë se rreth 59 për qind e amerikanëve e shohin njohjen online si një mënyrë të shkëlqyer për të takuar njerëz, por kjo nuk përputhet me realitetin, pasi vetëm 10 për qind e njerëzve njihen online. Të pyetur në një anketë tjetër, 1000 persona u përgjigjën se ishin njohur gjatë ngjarjeve sportive (12 për qind) ndërsa 11 për qind ishin njohur në festivale muzikore.
Në 15 për qind të rasteve, të anketuarit e kishin njohur partnerin/en në evente edukuese, bamirësie apo në takime me shkollën e dikurshme. Kjo ka kuptim, pasi në këtë rast njerëzit ndajnë vlera të përbashkëta.
Reagimi pas një takimi
Rreth 35 për qind e pjesëmarrësve në studim u shprehën se pasi ishin takuar, kishin shkëmbyer numrat e telefonit. Një shifër më e vogël, kishin shkëmbyer puthje që në njohjen e parë apo ishin kapur prej dore. Rreth 16 për qind të njerëzve kishin kryer marrëdhënie seksuale me personin tjetër, ndërsa vetëm 10 për qind pranojnë se kanë rënë menjëherë në dashuri.
Këshilla për të gjetur shpirtin binjak
Përpara se të jeni gati për të njohur një person ndaj të cilit do të përkushtoheni, së pari duhet të shijoni vetminë. Gjeni gjërat që ju interesojnë, vlerësoni personat që keni afër si miq apo familjarë. Ndiqni një karrierë të qëndrueshme dhe nxisni krenarinë dhe personalitetin e fortë te vetja.
Dëshironi të gjeni shpirtin binjak? Atëherë duhet të kultivoni te vetja tipare të dëshirueshme nga të tjerët. Gjithashtu bëni një listë të tipareve që ju pëlqejnë më shumë te një partner/e. Ndoshta ju tërheq sensi i humorit apo një buzëqeshje e ëmbël. Apo preferoni personat atletikë; të gjitha këto duhet të shërbejnë për ta pasur të qartë në mendje se çfarë do, e kjo do ta bëjë më të lehtë t’i dalloni edhe te të tjerët.
Është shumë e rëndësishme që të jeni mendjehapur dhe të eksperimentoni për të kuptuar se çfarë pëlqeni vërtet te një person. Largoni nga jeta juaj personat që ju tundojnë, por të cilët nuk mund t’i keni për një lidhje serioze pa u përfshirë në një tradhti.
Do t’ju shërbente shumë nëse krijoni një rrjet miqsh nga fusha të ndryshme, pasi miqtë ju ndihmojnë shumë në njohjen me njerëz të rinj dhe me interesa të përbashkët.
Gjithashtu jini miqësor dhe kuptoni se cilat janë mënyrat që njerëzit përdorin për të flirtuar. A e dini se një nga mënyrat më të përhapura është buzëqeshja? Mënyra e dytë më e përhapur që t’i afroni të tjerët është pohimi dhe mbështetja e fjalëve tuaja, të tjetra janë vazhdimi i bisedës, gjuha e hapur e trupit, ndarja e detajeve personale, kontakti me sy dhe ngritja e pyetjeve. /Burimi: Psychology Today