Koço Kokëdhima ia shiti pasuritë juristes së kompanisë. Pyetja: Ku i gjeti juristja paratë?

Blendi Fevizu, duke ju referuar një SMS-je, e pyeti Koço Kokëdhimën, “në se ia ka shitur aksionet e kompanive të tij juristes së kompanisë dhe ku i gjeti juristja gjithë ato para”.
“Ç’ju duhet ju kujt ia shes unë aksionet e kompanive të mia”, ishte justifikimi i Koço Kokëdhimës.
Koço Kokëdhima ka shmangur gjithashtu t’i përgjigjet pyetjes mbi emërimin e drejtorit të Drejtorit të Albpetrolit, i cili rezulton anëtar i bordeve drejtuese në kompanitë e tijat. Ai gjithashtu ka refuzuar të flasë edhe për emërimin e ish-drejtorit të Ujësjellësit të Tiranës, Neritan Gjojdeshi, duke u justifikuar me faktin, që ata nuk janë në zonën, Vlorë – Gjirokastër,  e drejtuar politikisht prej tij.
Ndërkohë gazetari Blendi Fevziu i ka numëruar një listë të gjatë me emra personash të emëruar në administratën publike të Jugut, në shënimin sipas listës së publikuar në “Opinion”, “rekomanduar nga Koço Kokëdhima”.
Lidhur me këtë listë, deputeti socialist, është justifikuar se ata nuk janë rekomandimet e tij personale, por të burimeve njerëzore të PS-së, të cilët ju kanë ofruar këtyre të punësuarve, asistencë se si të aplikojnë e të fitojnë këto vende pune.
Lidhur me përmendjen e emrit të tij, si biznesmeni që do të ndërtojë 60 ha, vaska peshku në Gjirin e Vlorës, deputeti Kokëdhima u shpreh në Opinion:
“Kam biseduar me kryetarin e bashkisë për 60 ha për vaska peshku në gjirin e Vlorës. I kam dhënë vetëm një këshillë Dritan Lelit: Kujdes me investimet që kanë impakt në ambient. Mos bëni asnjë hap pa u këshilluar me publikun dhe faktorët lokalë”.