Rama dhe Mogherini
Ish-shefia e diplomacisë së Bashkimit Evropian, dhe drejtore e Kolegjit të Evropës, Federica Mogherini, është ndaluar në Bruksel si pjesë e një hetimi të gjerë për mashtrim dhe shkelje të rregullave të prokurimit publik, që përfshin Kolegjin e Evropës dhe Shërbimin Evropian të Veprimit të Jashtëm (EEAS), raportojnë mediat belge. Së bashku me të, në paraburgim ndodhet edhe një nga diplomatët më të lartë të bllokut, Stefano Sannino, ndërsa në total janë shoqëruar tre persona.
Sipas gazetës Le Soir, policia belge kreu sot kontrolle në selinë e EEAS në Bruksel, në disa ndërtesa të Kolegjit të Evropës në Bruges, si dhe në banesa private. Operacioni u zhvillua me kërkesë të Zyrës së Prokurorit Publik Evropian (EPPO), e cila po heton procedurën e dhënies së kontratave për krijimin e Akademisë Diplomatike të Bashkimit Evropian – një program trajnimi nëntëmujor për diplomatët e rinj të BE-së.
Hetimi lidhet me dyshimet se, gjatë viteve 2021–2022, mund të jenë shkelur rregullat e konkurrencës së ndershme, duke i dhënë Kolegjit të Evropës avantazh të padrejtë në procedurën e tenderit. Dyshohet për mashtrim në kontrata publike, korrupsion, konflikt interesi dhe shkelje të sekretit profesional. EPPO thotë se ka “dyshime të forta” se Kolegji është informuar paraprakisht për kriteret e tenderit përpara publikimit zyrtar.
Mogherini, rektore e Kolegjit të Evropës që prej vitit 2020 dhe ish-Përfaqësuese e Lartë e BE-së për Politikën e Jashtme, ka drejtuar Akademinë Diplomatike që nga gushti 2022. Sannino, ndërkohë, aktualisht mban post drejtues në Komisionin Evropian.
Punonjës të EEAS-it konfirmuan se bastisjet janë kryer në ndërtesën administrative të institucionit në Rue d’Arlon, ku stafi u urdhërua të braktiste zyrat dhe të linte mobiliet të hapura. Sipas një zyrtari të lartë të BE-së, hetimi ka nisur para se Kaja Kallas të merrte drejtimin e shërbimit diplomatik të BE-së.
Komisioni Evropian refuzoi të komentojë mbi ndalimet apo detaje shtesë të hetimit, ndërsa EPPO bëri me dije se ka kërkuar heqjen e imunitetit diplomatik për disa prej të dyshuarve përpara nisjes së procedurës. Bastisjet u raportuan fillimisht nga Euractiv dhe Politico. m.k
