Kryesia e Këshillit Bashkiak të Tiranës do të mblidhet këtë të martë në orën 15:00, një orë përpara seancës plenare ku pritet të diskutohet dhe të vendoset për shkarkimin e kryebashkiakut Erion Veliaj.
Ndërkaq tensionet mes mazhorancës dhe opozitës janë rritur për shkak të procedurave. Këshilltari demokrat Ilir Alimehmeti ka kërkuar shpjegime pse kërkesa e opozitës për shkarkimin e Veliajt nuk është përfshirë në rend dite, ndërsa Dorian Teliti ka insistuar që kryebashkiaku të dëgjohet në mbledhje, siç ai vetë ka kërkuar.
Në emër të shumicës, Endrit Braimllari deklaroi se kërkesa e PD është refuzuar, duke shtuar se opozita mund ta parashtrojë këtë pretendim në mbledhjen e kryesisë. Ndërkohë, procedurat për shkarkimin e Veliajt janë nisur nga këshilltarët socialistë, pas udhëzimit të drejtpërdrejtë të Kryeministrit Edi Rama. Veliaj ndodhet në paraburgim prej muajit shkurt, nën akuzat për korrupsion dhe shpërdorim detyre.
Nga qelia, kryebashkiaku ka kërkuar me shkrim të jetë i pranishëm në mbledhje, por kërkesa është drejtuar gabimisht Këshillit Bashkiak dhe jo Drejtorisë së Përgjithshme të Burgjeve, që ka kompetencën për lëshimin e lejeve të veçanta. Sekretari i Këshillit, Endrit Braimllari, e ka refuzuar kërkesën duke e ftuar Veliajn të mbrohet “me laps e letër”. Në një tjetër reagim, Veliaj e ka konsideruar procesin antikushtetues.
Megjithatë, votat duken të sigurta për shkarkimin, pasi përveç socialistëve, edhe këshilltarët opozitarë janë shprehur se do ta mbështesin. Vendimi përfundimtar do të kalojë në Këshillin e Ministrave, që firmos shkarkimin, por ekzekutimi i tij hyn në fuqi pas 15 ditësh.
Kushtetuta i jep të drejtë Veliajt ta ankimojë vendimin në Gjykatën Kushtetuese, e cila në rast shqyrtimi mund ta shtyjë procesin me muaj. Kjo nënkupton se planet e socialistëve për zgjedhje të parakohshme në Tiranë mund të shtyhen deri në fillim të vitit 2026.
