Kryebashkiaku i Vlorës, Ermal Dredha, ka dhënë dorëheqjen nga posti i tij, bëjmë të ditur burime të afërta me kreun e bashkisë.
Arsyet e sakta të dorëheqjes së papritur nuk janë bërë ende publike, por zhvillimi vjen pas një sërë kritikash të hapura të kryeministrit Edi Rama ndaj punës së tij. Vetëm një javë më parë, gjatë një takimi për Operatorin Kombëtar të Ujit, Rama e vuri në shënjestër Ujësjellësin e Vlorës, duke e cilësuar me probleme serioze menaxhimi.
Nuk ishte hera e parë që kreu i qeverisë kritikonte Dredhën. Në korrik, gjatë një vizite në lagjen e vjetër Muradie, Rama u shpreh i pakënaqur për menaxhimin e hapësirave publike, duke e cilësuar zonën si të zaptuar. Po ashtu, në qershor, me rastin e 34-vjetorit të Partisë Socialiste, një moment përplasjeje mes Ramës dhe Dredhës u kap nga kamerat, edhe pse nuk u bë e ditur përmbajtja e debatit.
Ermal Dredha mori drejtimin e Bashkisë së Vlorës pas zgjedhjeve vendore të 14 majit 2023, duke pasuar në këtë detyrë Dritan Lelin. m.k
