Kreu i PD-së Lulzim Basha apeloi në një dalje publike se “Rama të heqw dorë nga lojërat, dhe se PD do të jetë sot në parlament për të votuar reformën sipas marrëveshjes”.
Këtë deklaratë e bëri pas pretendimeve se ai ka shtuar disa kërkesa të reja, pas marrëveshjes së arritur, nga letra e komisionarit Johanes Hahn.
Sipas Bashës, “Marrëveshja ka qenë që për të 4 institucionet të operohej në bazë të së njëjtës formulë të vetingut. Kjo u dakordwsua të hënën në takimin e negociatorëve, ndërsa u konfirmuar mbrëmë edhe nga negociatorët e PD dhe LSI, respektivisht Oerd Bylukbashi dhe Ylli Manjani”, sqaroi Basha.
Më tej kreu i PD-së e quajti mashtrim të turpshëm, pretendimin se ai ka shpallur kërkesa të reja pas marrëveshjes së djeshme.
Duke risjellë para gazetarëve, pamjet video të një deklarimi të tij të pak ditëve më parë, Basha u shpreh se, “Është një mashtrim i turpshëm se Basha ka kërkesa të tjera pas marrëveshjes. Çdo mashtrim që kanë marrë dje ndërkombëtarët bien poshtë me këto dy prova”.
Duke ripërsëritur se nuk ka asnjë kërkesë të re, Basha kujtoi një deklaratë të sinqertë të Fatmir Xhafajt mbrëmë, sipas të cilit “pranoi se drafti zyrtar i cili është dërguar për diskutim e miratim në Kuvend, nuk përfshin as rekomandimet Nuland as rekomandimet Hahn”, u shpreh Basha duke apeluar “Rama të heqë dorë nga lojërat, dhe se PD do të jetë sot në parlament për të votuar reformën sipas marrëveshjes”, në mbyllje të deklaratës së tij.
Deklarata e plotë për mediat e Kryetarit të Partisë Demokratike, Lulzim Basha
Mirëmëngjesi. E sigurt që shumica prej jush në këtë sallë kanë ndenjur deri në orët e vona mbrëmë dhe kanë nisur ditën sot herët në mëngjes, sikurse unë dhe bashkëpunëtorët e mi dhe mijëra qytetarë. Po, me mijëra qytetarë që dje pavarësisht bindjeve politike, iu bashkuan gëzimit të përligjur për arritjen e marrëveshjes kombëtare për Reformën në Drejtësi.
Marrëveshje, e cila nuk i shërben interesit të një partie politike por interesit të Shqipërisë dhe çdo shqiptari. Kemi një marrëveshje. Përpjekjet tona kanë arritur një marrëveshje më të mirë, një projekt më të mire, jo për Partinë Demokratike por për Shqipërinë, ndaj sot i bëj thirrje të gjitha palëve ta votojnë këtë marrëveshje në Kuvendin e Shqipërisë.
Për fat të keq, mbrëmë, kjo marrëveshje është vënë sërish në dyshim dhe jam sot këtu për t’i shpjeguar çdo shqiptari faktet.
E para, ka pasur një mirëkuptim, një marrëveshje prej kohësh se për të katër institucionet, subjekt i nenit 88 do të aplikohej e njëjta formulë. Për të katër institucionet, e keni dëgjuar me dhjetëra here këtë, ta them këtu në këtë sallë.
Të Hënën, kjo pjesë e marrëveshjes është konfirmuar nga Partia Socialiste. Këtë e thotë negociatori i Partisë Demokratike, Oerd Bylykbashi. Këtë e konfirmon negociatori i Lëvizjes Socialiste për Integrim, Ylli Manjani. Të hënën, negociatori i Partisë Socialiste ka pranuar se marrëveshja qëndron për katër institucionet, sigurisht për KLGJ dhe për KLP me tre anëtarë për mazhorancën dhe dy anëtarë për opozitën.
Eshtë pretenduar dje, se Basha ka prezantuar kushte të reja pasi është arritur marrëveshja.
Ky është një mashtrim i turpshëm.
Ditën e hënë, Partia Socialiste i konfirmoi negociatorit tim përmes negociatorit të saj se marrëveshja është për të katër institucionet dhe shikoni çfarë ka thënë Lulzim Basha ditën e Martë, një ditë para marrëveshjes se djeshme në këtë sallë në prani të gazetarëve:
“Mbi bazën e këtyre kritereve sigurisht do të vendoset nëse i plotëson apo nuk i plotëson. Dhe mosplotësimi i njërit prej kritereve automatikisht e çon aplikuesin në moskandidim. Plotësimi i gjithë këtyre kritereve përbën listën e kandidatëve nga e cila pastaj, sipas procedurës së parashikuar në procedurën hibride, përzgjidhen komisionerët e Vettingut, përzgjidhen komisionerët publikë, përzgjidhen anëtarët e KLGJ-së jogjyqtarë dhe anëtarët e KLP-së joprokurorë”.
Pra, përzgjidhen komisionerët e Vetingut, përzgjidhen komisionerët publikë, përzgjidhen anëtarët e jogjyqtarë të KLGJ-së, përzgjidhen anëtarët joprokurorë KLP-së, sipas të njëjtën formulë.
Ky ka qenë qëndrimi i Lulzim Bashës, për ata që nuk e dinë dhe për ata që rrejnë me dëshirë apo me projekte të zeza për Shqipërinë.
Partnerëve ndërkombëtarë sot dua t’u bëj me dije se çdo mashtrim që mund të kenë marrë dje nga pala kundërshtare bie përtokë me këto dy prova.
U them gjithë partnerëve, SHBA, BE, këto janë fakte të bazuara mbi evidenca të pakundërshtueshme. Ky është qëndrimi i im të martën.
Ku është kushti i ri? Ku është kushti i ri?
Mbrëmë në mesnatë në një moment sinqeriteti, Fatmir Xhafaj, kryetari i Komisionit Ad–Hoc për drejtësinë, pranoi se drafti zyrtar i PS, drafti zyrtar që ndodhet sot në Kuvend sipas procedurave zyrtare, me përjashtimin e opozitës pas dështimit të së hënës, nuk përfshin as rekomandimet Nuland, as rekomandimet Hahn.
Por duan të na bëjnë ne, të besojmë që të pranojmë pjesën për KLGJ-në dhe për KLP-në. Pse?
Ky është një draft i parakorduar. PD, kurrë nuk e ka pranuar këtë draft, as nuk e ka parë këtë draft. Pjesa për KLGJ-në dhe KLP-në është formula e vjetër e votës të vetme të transferueshme që ne e kemi konsideruar publikisht vota e vetme e trafikueshme.
Pse ndodh kjo? Ndoshta e shpjegojmë pak më vonë.
Por ne kemi një marrëveshje. Ne i përmbahemi kësaj marrëveshje. Ne jemi gati ta votojmë këtë marrëveshje sot në Parlament, për interesat e Shqipërisë.
Këtë kam deklaruar dje publikisht para shqiptarëve, këtë ka deklaruar në mënyrë unanime grupi parlamentar.
Pse do ta bënim diçka të tillë? Pse do t’ia anonçonim marrëveshjen Kancelares Angela Merkel, Ndihmës Sekretares Victoria Nuland, Komisionerit për Zgjerimin Johannes Hahn, kryetarit të Partive Popullore Joseph Daul, kryetarit të Komisionit të Marrëdhënieve me Jashtë të Parlamentit Europian Elmar Brok, kryetarit të Presidencës të Bashkimit Europian Lajcak, në telefon gjatë gjithë ditës.
Pse do ta bënim këtë dhe pastaj të riktheheshim në tavolinë për të ribërë marrëveshjen? Pse a mund ta thotë dikush?
Ky është një mashtrim i pacipë.
Ka një marrëveshje mbi tavolinë dhe Edi Rama duhet ta zbatojë këtë marrëveshje dhe t’i japim shqiptarëve sot reformën e shumëpritur në drejtësi sipas draftit të rakorduar nga të gjitha palët.
Partia Demokratike do të jetë sot në Parlament me votat e saj për këtë marrëveshje.
I bëj thirrje Edi Ramës të heqë dorë nga lojërat dhe të heqë pengesën e fundit duke votuar marrëveshjen e arritur për reformën në drejtësi.
