Kryeministri grek Kyriakos Mitsotakis thotë se është i zhgënjyer dhe i indinjuar nga qëndrimi i qeverisë shqiptare në lidhje me arrestimin e kryetarit të Bashkisë së Himarës, Fredi Beleri.
“Pata rastin të informoj homologët e mi për atë që po ndodh në Shqipëri për rastin e kryebashkiakut të zgjedhur të Himarës dhe të shpreh zhgënjimin, indinjatën time për faktin se një kryetar i zgjedhur arrestohet dy ditë pas zgjedhjes së tij dhe ndodhet në burg, për ne, me dispozita të dyshimta procedurale.
Respektimi i rregullave bazë të shtetit ligjor është një kusht i panegociueshëm për çdo vend që parashikon të bëhet anëtar i familjes evropiane. Dua të besoj se ky mesazh është kuptuar plotësisht edhe në Shqipëri. Unë e respektoj absolutisht ndarjen e pushteteve, dua të jem shumë i qartë për këtë, por nga ana tjetër nuk është një çështje që do ta lë të shkojë kështu, pa pasur një reagim nga Greqia. Dhe reagimi i parë u shpreh në Këshillin Evropian”.
Fredi Beleri u arrestua dy ditë përpara votimeve me akuzën për shitblerjen e votave. Konstituimi i Këshillit Bashkiak u krye pa betimin e tij si kryebashkiak, pasi ishte në paraburgim.
