Policia e Durrësit ka arrestuar mbrëmë vëllain dhe nipin e ish-oficerit të lartë të shërbimit sekret në Durrës, Isa Çopës, i cili u gjet i djegur brenda makinës së tij “Opel Korsa” më 24 tetor të vitit 2011.
Halit Çopa dhe djali i tij 20-vjeçar akuzohen për veprën penale “Kundërshtim i punonjësit të policisë”, ndërsa i biri edhe për veprën penale “Trafikim i lëndëve narkotike”, pasi i është gjetur dhe sekuestruar në cilësinë e provës materiale një sasi prej 500 gr drogë.
Rreth orës 22:00, policia ka shkuar për kontroll në banesën e familjes Çopa, në lagjen nr.11 të qytetit bregdetar si dhe për të ndaluar djalin e kësaj familjeje. Menjëherë ka reaguar kryefamiljari, Halit Çopa, i cili u ka thënë policëve nëse kishin mandat kontrolli dhe përse po e shqetësonin në orët e natës. Pas kundërshtimit, blutë i kanë vënë prangat 50-vjeçarit dhe e kanë çuar në komisariat bashkë me të birin.
Anëtarë të familjes Çopa deklaruan se policia ka dhunuar e rrahur djalin në sy të tyre, por policia nuk e ka përfshirë këtë arrestim në njoftimet e saj.
Ndonëse kanë kaluar 5 vjet nga ngjarja e rëndë e ndodhur në zonën e Currilave në Durrës, ende nuk është bërë e mundur zbardhja e ekzekutimit me djegie të oficerit të SHISH Isa Copës.
