Policia e Shtetit në mënyrë të papritur ka paditur ish deputetin Muslim Murrizi për fshehje të pasurisë, transaksione dhe depozitime të dyshimta parash, me qëllim pastrimin e tyre duke çuditur shumëkënd që nul ua rrok syri mbi 1 miliardë euro që pastrohen në ndertim pak metra nga zyrat e policisë së shtetit.
Ish-deputeti Myslim Murrizi dhe familjarët e tij kanë kryer transaksione të dyshimta në disa banka, në vlerën e afro 734 mijë eurove, thuhet në kallzimin e policisë siguruar nga zeri i amerikës.
Veprimet e dyshimta bankare në shuma të konsiderueshme janë kryer gjatë një periudhe 13 vjeçare, nga dhjetori 2008 deri në qershor 2021.
“Këto veprime financiare janë kryer nga vet zoti Murrizi, nga persona të tretë, kalime të hollash mes llogarive të shtetasit, kalime në favor të subjektit të administruar prej tij, “Murrizi 2009” dhe tërheqje cash (para të thata)” – thuhet në dokumentat e paraqitura nga policia.
Gjithashtu aty përshkruhen veprime të dyshimta bankare për blerjen e një automjeti 8 vjet më parë, në vlerën e 78 mijë eurove në favor të një subjekti, transferta dhe kreditime prej 515 mijë eurosh si dhe këste kredie në mijëra euro për blerje apartamenti.
Një seri veprimesh të dyshimta janë kryer në një tjetër llogari bankare sërish për blerje automjeti dhe apartamenti në shuma prej dhjetra mijëra eurosh, ku familjarë të ish-deputetit Murrizi depozitojnë cash në favor të tij.
“Këmbime valutore, kalime nga/për të tretë me qëllim likuidim detyrimesh, shitblerje pasurish të paluajtshme, tërheqje në cash”, përshkruan policia një larmi veprimesh bankare të dyshimta me dhjetëra mijëra euro, të cilat kalojnë në përfitim të ish deputetit Murrizi, herë si ortak, herë si kthim kontributesh, duke tërhequr vëmendjen e policisë për hapa të paligjshme, që duhen hetuar, raporton Zeri i Amerikës.
Ish-deputeti Murrizi i ka hedhur poshtë akuzat në mediat vendase, duke kujtuar se pasuria e tij është e deklaruar dhe se dokumentat janë në Inspektoriatin e Lartë të Deklarimit dhe Kontrollit të Pasurive ndërsa ka publikuar vendime të gjykatave për disa detaje të përfshira në akuzën e policisë. m.k
