Me mijëra janë mesazhet e ngushëllimit për humbjen e Ramush Tahirit. Ne kemi përzgjedhur vetëm disa prej tyre që theksojnë personalitetin e Tahirit, si një ndër njerëzit me më ndikim në këto 30 vite në Kosovë.
Enver Hoxhaj, ish kryetar i PDK, ish ministër i Jashtëm, politolog
Ditë e pikëlluar sot. Vdekja e Ramush Tahirit do të lë një boshllëk të madh të mikut plot virtyte dhe të aktivistit shumëvjeçar në shërbim të vendit.
Në tre dekadat e fundit, ai ka dhënë një kontribut shumë të madh për lirinë, pavarësinë dhe zhvillimin e demokracisë në Kosovë.
Me Ramushin kemi punuar në Ministrinë e Punëve të Jashtme në një përiudhë të rëndësishme të shtetndërtimit.
Në periudhat më të rëndësishme të zhvillimit të vendit, Ramush Tahiri ishte gjithmonë ai zëri i arsyes dhe ai mendim i balancuar politik që aq shumë na duhej.
Ngushëllime familjes për humbjen e njeriut të dashur! Ngushëllime miqve për humbjen e mikut me virtyte të rralla dhe ngushëllime vendit për humbjen e një njeriu të papërsëritshëm!
Pusho në paqe miku im!
Glauk Konjufca, kryetar i Parlamentit të Kosovës:
I tronditur e mora lajmin për ndarjen e parakohshme nga jeta të politologut tonë të shquar, Ramush Tahiri.
Rezoni politik që ai ka reflektuar sa herë diskutonte për zhvillimet kombëtare, rajonale e ndërkombëtare, ishin gjithnjë frymëzuese
Për më shumë se tri dekada ai dha një kontribut të vyer gjatë përpjekjes sonë të suksesshme kolektive për çlirim nga okupimi serb dhe shtetndërtimin e Republikës.
Duke e pas njohur personalisht dhe pjesëmarrës bashkë me të nëpër shumë emisione televizive, Ramush Tahiri do të na mungojë të gjithëve.
Ngushëllime familjes Tahiri, miqve e bashkëpunëtorëve të tij.
U prehtë i qetë e në paqe!
Lutfi Haziri, n/kryetar i LDK, deputet:
Na paska lënë njeriu i mirë, politologu i shkëlqyer, intelektuali, publicisti e njohësi më i mirë i rrethanave politike të Kosovës në tri dekadat e fundit, Ramush Tahiri. E kam pasur fatin të bashkëpunojë me të ndjerin në shumë raste dhe vërtet ka qenë brilant në çdo aspekt. Ngushëllimet më të sinqerta familjes Tahiri, shokëve, kolegëve, miqve e farefisit. Lamtumirë, miku i im i shtrenjtë!
Bardhyl Meta, deputet, Kosovë:
Iku edhe një mik i mirë i bashkebisedimeve tona të qeta, të kulturura e të gjata politike – që i bënim tash e 32 vite – Politologu, Ramush Tahiri!
Ramush Tahiri ka qenë edhe Nënkryetar i Qeverisë Bukushi dhe Ministër i Mbrojtjes gjatë viteve të para të saj (1991-1992)!
– Ishte kreativ në politikbërje, dhe shumë dimensional në analizë politike e gjeostrategjike!
Ramush Tahiri ishte – dhe kjo duhet theksuar fort e fort – ishte njëri ndër bashkëhartuesit e „3 Opcioneve“ të Presidentit Rugova e Kosovës (Stupiçke Toplice, 18 a 24 Janar 1991) karshi sfidave të shperbërjes së Jugosllavisë!
Për Ramush Tahirin mund të shkruhet e flitet shumë, shumë më shumë nga sa po lexojë në media – ku për shkak të ndërrimit të gjeneratave ndër gazetarë në media – informata mortore po reduktohet në „Vdes analisti politik – Ramush Tahiri“!
Ngushëllime profesoreshës Lindita Tahiri dhe dy djemëve, sikurse edhe gjithë familjes së gjerë e miqve të shumtë…
Të qoft i lehtë dheu i Kosovës, mik e bashkëudhëtarë!
