“Detyrim paraqitje” për kreun e IMT Bashkia Tiranë, Mariglen Qaton. Kështu vendosi sot Gjykata e Tiranës për zyrtarin e lartë të bashkisë.
Qato është nën hetim për akuzën e shpërdorimit të detyrës kryer në bashkëpunim, ndërkohë që Prokuroria kishte kërkuar masë sigurie arrest me burg.
Po kështu gjykata ka vendosur detyrim paraqitje edhe për inspektorët e IMT, Adrian Caushaj dhe Leandro Lamani.
Cëahtja për të cilën akuzohet:
Prokuroria e Tiranës ka nisur hetimin, pas një referimi të Policisë Gjyqësore, e cila kishte konstatuar punime mbi tarracën e një pallati 5-katësh në kompleksin “Ndërtim Vila”, në rrugën “Haxhi Kika”, raporton Boldnews.al
Pasi janë kryer verifikimet, është evidentuar se sipërmarrësit e ndërtimit, Klevis dhe Eugert Bregu, po kryenin punime ndërtimore, ndërkohë që ishin pajisur me “deklaratë paraprake”, e cila jepet vetëm për meremetime të thjeshta.
Në 31 Korrik 2020, Policia njoftoi Inspektoratin Ndërtimor të Tiranës për konstatimin e punimeve ndërtimore pa leje në tarracën e pallatit në fjalë.
Tre ditë më pas, Policia evidenton sërish se punimet po vijonin, ndërkohë që nga kryeinspektori ndërtimor, Mariglen Qato dhe inspektorët e zonës, Çaushaj dhe Lamani nuk ishte marrë asnjë masë, pavarësisht njoftimit.
Në 10 Gusht 2020, Inspektorati Ndërtimor i Bashkisë së Tiranës njofton Komisariatin e Policisë nr.2 se kishin kryer verifikimet për punimet e vëllezërve Bregu dhe kishin konstatuar tejkalim të lejes.
Për këtë arsye, ishte marrë vendimi për pezullimin e punimeve dhe gjobitjen e sipërmarrësit, Eugert Bregu.
Në vijim të hetimeve të nisura nga Prokuroria e Tiranës, si edhe për të kuptuar gjendjen e ndërtimit pas marrjes së masave të mësipërme, në datë 25 Shkurt 2021 është bërë kqyrja e objektit, në prani të Policisë Gjyqësore dhe inspektorëve ndërtimorë të Bashkisë së Tiranës.
Nga kqyrja rezultoi se punimet në katin shtesë jo vetëm që nuk ishin ndaluar, por, përkundrazi, aty tashmë kishte përfunduar ndërtimi, përfshirë muret e jashtme, muret ndarëse të apartamentit, dhomat e gjumit, tualetet, e të tjerë.
Pra, ndërtimi pa leje kishte marrë fizionominë e plotë të katit shtesë, ndërkohë që sipërmarrësit kishin aplikuar edhe pranë zyrës së ALUIZNI-t për ta legalizuar objektin.
Sipas Prokurorisë së Tiranës, kryeinspektori ndërtimor i Bashkisë së kryeqytetit, Mariglen Qato dhe inspektorët Leandro Lamani e Adrian Çaushaj, jo vetëm që nuk kanë përmbushur misionin e ngarkuar me ligj për mbrojtjen e territorit dhe mjedisit nga ndërtimi i kundërligjshëm, por, në mospërmbushje të rregullt të detyrës, në kundërshtim me ligjin, kanë lejuar ndërtimin e kundërligjshëm.
Për këtë arsye, prokuroria kërkoi ndaj tyre caktimin e masës së sigurisë “arrest me burg”, të dyshuar për “Shpërdorim detyre”.
E njëjta masë u kërkua edhe për Klevis e Eugert Bregu, të dyshuar për “Ndërtim të paligjshëm”.
Megjithatë, gjykata e Tiranës u tregua shumë tolerante, duke mos e rënduar vartësin e rëndësishëm të kryebashkiakut Erion Veliaj.
m.k
