Drejtuesi Politik i PD për Elbasanin, Gazment Bardhi u takua me të rinj, studentë dhe votues për herë të parë, ku ndau me ta pjesë të programit dhe i siguroi për vullnetin që ka për ti bërë ata nesër pjesë të ushtrimit të përgjegjësive.
Bardhi theksoi se rinia është më e prekura dhe më e zhgënjyera nga këto 8 vite qeverisje.
“Prej fillimit, porosia që i kam lënë ekipit është se dua çdo ditë të kem takim me të rinjtë. E di mirë se pjesa më e zhgenjyer në këto 8 vite keqqeverisje është rinia.
Nëse unë ju pyes sot a doni të jetoni në Shqipëri apo të ikni, jam i sigurtë se pjesa dërrmuese do ngrini dorën e do pohoni se doni të largoheni jashtë.
Kjo për faktin se këtu nuk shihni asnjë mundësi. Meritokracia dhe zotësia nuk ka rëndësinë që do duhej të kishte në një vend që ka 30 vite që pretendon se është demokraci funksionale. Zhgënjimi juaj është treguesi më i mprehte i matjes së asaj që ka ofruar qeveria në këto 8 vite”, u shpreh Bardhi.
Ai shtoi se pas dy mandateve, një qeveri do të duhej të bënte bilanc, por në mungesë të kësaj, kryeministri aktual vetëm shan opozitën dhe bën propagandë me gjërat që nuk i takojnë atij.
“Pas 8 viteve në qeveri, ai do duhej të ishte para publikut duke dhënë llogari e bërë bilanc, duke thënë kam marrë këtë angazhim e kam bërë këtë gjë. Por del nga mengjesi deri në darkë në televizion dhe merret vetëm me opozitën.
Këtë e bën se nuk ka bilanc. Një kryeministër nuk monitoron nga mengjesi në darkë si po e bën një i moshuar vaksinën, se nuk është kjo puna e tij. Nuk është as kameraman as fotograf. Vaksinimi është proces normal që po ndodh në gjithë botën. Eshte detyrë e qeverisë. Siç është detyrë e qeverisë të rimbursojë ata që kanë lënë kursimet e jetës nga kjo semundje, që nuk po e bën. Detyrë e qeverisë është t’u japë shpresë të rinjve, të krijojë vende pune. Të ulë tarifat e shkollimit, të rrisë pagat e pensionet, siç nuk po e bën”, deklaroi Bardhi.
Drejtuesi Politik i PD tha se rinia e ka vullnetin dhe dëshirën për të shërbyer, për të marrë përgjegjësi për qytetarët dhe vendin, vetëm se u duhet dhënë një shans. Ai solli eksperiencën e tij kur ka nisur punë pasi mbaroi universitetin, dhe tha se këtë ndryshim e kemi në dorë ta bëjmë me 25 Prill, por më së pari, duhej angazhimi dhe pjesmarrja e të gjithëve në zgjedhje.
“Nuk mund të ecë para Shqipëria nëse nuk u jep shpresë të rinjve se ky vend mund të behet. Shihni programin e PD. Dy janë fjalët që përsëriten më shpesh aty. Rinia dhe familja. Ndaj kemi parashikuar që 1 në 3 studentë do të ketë stazh të paguar. Eshtë paradhomë e sigurtë drejt një punësimi të mirë. Nuk e shoh rininë që të vini tani në fushatë me mua, e pastaj t’u them mirupafshim. Jam me vullnetin e plotë që këtu në Elbasan t’u japim mundësinë të rinjve për të administruar pushtet e për të marrë në dorë shërbime që u duhen ofruar qytetarëve, përfshirë dhe në institucione shtetërore.
Jam i bindur se njëlloj si unë që isha 22 vjeç, kur fillova për herë të parë punë, për shkak të pasionit dhe se doja të mësoja, punoja 15 orë në ditë, sepse doja të shpërbleja besimin që më ishte dhënë për të filluar punë në një institucion të rëndësishëm, kisha dëshirën për t’u bërë i zoti e për t’u shërbyer njerëzve, pjesa dërrmuese prej jush, prej rinisë shqiptare, ka të njëjtin vullnet. Thjesht dikush duhet t’u japë mundësinë ta tregoni këtë, të manifestoni zotësinë, vlerat tuaja të tregoni se e doni Shqipërinë. Doni të punoni e të jetoni në Shqipëri. Zëri juaj në këto zgjedhje do duhet të jetë i fuqishëm, më së pari duke marrë pjesë. Bashkarisht do të kthejmë shpresën se këtu mund të jetohet e të ndërtohet e ardhmja”, deklaroi Bardhi. a.b
