Foto Arkiv
Shoqata e “Punonjësve të Policisë në Lirim – 2013” ka reaguar ndaj raportit të misionit PAMECA IV, për disa çështje të rëndësishme që janë në proces hetimi apo gjykimi.
Kjo shoqatë thotë se, raporti për dosjet sensitive për shkak të ngarkesave të mëdha kriminale të autorëve do të ishte i mirëpritur nëse do të inkurajohej drejtësia për të goditur krimin e organizuar, ndërsa konstaton se PAMECA ka dalë jashtë objektit të punës.
“Në të vërtetë ajo që ne konstatojmë fatkeqësisht, është dalja e Misionit PAMECA IV jashtë objektit të punës duke u bërë pjesë e lojës politike të Ministrit të Brendshëm, i cili njihet për lidhjet e dyshimta me botën e krimit dhe në veçanti me këta persona që janë objekt i hetimit nga Drejtësia”.
Shoqata e “Punonjësve të Policisë në Lirim – 2013” nënvizon se PAMECA IV nuk ka reaguar ndaj çështjeve të tjera sensitive, si emërimet në polici që konsiderohen në kundështim me ligjin, për politizimin e policisë dhe futjen në radhët e saj të personave me precedentë kriminalë apo për situatën shqetësuese të kanabisit.
“Ky Mision, fatkeqësisht konstatohet se po devijon nga pritshmëritë që qytetarët shqiptarë kanë pasur ndaj tij, por edhe takspaguesit europianë, që nuk do të donin që taksat e tyre të shpërdoroheshin. Ata presin që PAMECA IV të jetë garante e ligjit, dhe jo mbrojtëse e paligjshmërisë”.
Në raportin e PAMECA IV theksohej se prokuroria dhe gjykatat kishin vepruar jo mbi prova, por mbi bazë dyshimesh për hetimet ndaj Drejtorit të Policisë së Shtetit, Haki Çako apo arrestimin e Emiljano Shullazit dhe Kryebashkiakut të Kavajës, Elvis Roshi. Ky i fundit u lirua të mërkurën, dy ditë pas publikimit të raportit.
