Të drejtën për tu kthyer në atdhe në këtë situatë pandemie do ta kenë vetëm ata që kanë para për të paguar biletën e avionit dhe qëndrimin prej 14 ditësh në hotel. Ministrja e Infrastrukturës, Belinda Balluku nuk do të marrë mendimin dhe as listën e ambasadave, por ka vendosur të veprojë vetëm me një kompani ajrore, madje duke organizuar dhe hotelet ku do të qëndrojnë shqiptarët e mbetur jashtë kufirit. Enigmë mbetet fakti se si do të veprohet me ato qindra familje që kanë mbetur rrugëve dhe pa të ardhura jashtë vendit të tyre.
Nga e enjtja vetëm ata që kanë mundësi financiare do të mund të kthehen në Shqipëri, por me kusht që më parë të kenë prenotuar paketën, biletë avioni dhe hotelin. Në të kundërt ata nuk do të lejohet të kalojnë kufirin e atdheut të tyre.
Pasi të bëjnë pagesën e biletës, do t’u dërgohet edhe linku me hotelin në Durrës ku duhet të rezervojë karantinimin për 14 ditë.
Qeveria shqiptare i ka dhënë të drejtë të operojë vetëm kompanisë ajrore Air Albania, duke e centralizuar këtë shërbim, pasi nuk do të lejohet përfshirja e linjave të tjera në këtë proces.
Çmimet e biletave me Italinë dhe me qytetet e tjera evropiane ende nuk janë bërë publike, por aplikimet do të nisin nga e enjtja në orën 10:00. Por edhe shqiptarët apo italianët të cilët duan të fluturojnë drejt vendit fqinjë kanë vetëm një mundësi, kompaninë Air Albania të zgjedhur nga Ministrja Balluku.
Me anë të këtij propozimi qeveria shqiptare ka anashkaluar të gjithë selitë diplomatike dhe Ministrinë e Jashtme të cilët e kanë një database të shtetasve të cilët janë në nevojë. Këto kompetenca tashmë janë në dorën e Ministrisë së Infrastrukturës dhe kompanisë ajrore, të cilët do të rinisin nga fillimi procesi i regjistrimit të qytetarëve të cilët kanë mbetur jashtë kufijve shqiptarë.
Janë të shumtë, sidomos në Italinë fqinje, raste të tilla që po jetojnë në situata të vështirë por nuk kanë mundësi të paguajnë avionin dhe hotelin. Ende nuk ka një përgjigje nga ana e autoriteteve shqiptare se çfarë do të bëjë me këta shtetas. Përgjegjësi e kujt janë, apo do vijojë qeveria shqiptare të vendosë barrierë COVID-19./ora
