Hetim dhe sekuestrim pasurive të Emiljano Shullazit, Prokuroria nis zbatimin e “Antimafias”

Kur ndaj Emiljano Shullazit dhe shokëve të tij është vendosur data 10 maj si dita kur do të çelet procesi  për një sërë akuzash, Prokuroria e Krimeve të Rënda vazhdon të kërkojë të dhëna shtesë ndaj pesë të dyshuarve, që të gjithë ata në lidhje familjare dhe shoqërore me njëri-tjetrin.
Një burim i shpjegoi Top Channel se ndaj pesë të akuzuarve  ka nisur edhe hetimi pasuror bazuar në ligjin Antimafia, përderisa të akuzuarit do të dalin para drejtësisë edhe për veprën e grupit të strukturuar kriminal.
Në vijim të llogarive të hapura ndaj Shullazit, prokurorët e Krimeve të Rënda u kanë kërkuar informacion bankave në vend, por edhe institucioneve të ndryshme, për t’u bindur dhe për të hetuar nëse 39-vjeçari posedon pasuri të luajtshme dhe të paluajtshme.
Nëse konfirmohet që Shullazi ka llogari bankare, apo asete të pajustifikuara, siç shprehen hetuesit, do të kërkohet sekuestrimi i tyre si pasuri të formuara përmes krimit.
E njëjta procedurë është ndjekur nga grupi i hetimit edhe për të dyshuarit Gilmando Dani, Blerim Shullazi, Endri Qyqa dhe Endri Zelan, që të gjithë ata të paraburgosur si pjesë e të njëjtës dosje.
Por ai që shikohet si kryesuesi i grupit është Emiljano Shullazi, mbi të cilin rëndojnë nëntë akuza, që nga kanosjet deri tek gjobëvëniet. Sipas Prokurorisë, Shullazi është njeriu që formoi grupin kriminal, zgjodhi anëtarët dhe ndau rolet në grupin që ka operuar mes të tjerash edhe me gjobëvënie në dëm të biznesmenëve Ylbi Beqja, Jani Zaka dhe Adriatik Kërçuku.
Shullazi po e pret gjykimin në gjendje arresti prej një viti, në një kohë që është nën hetim edhe për vepra të tjera, sikurse dyshimet për implikim në çështje droge. TCH