Nga Alba Haruni
Të dashur miq!
Mbase nuk do të qe fare e udhës të shkruaja këto rreshta, por kuptoj se disa prej jush, nisur nga dashamirësia dhe ndjesia që keni për çështjen e trojeve shqiptare të Çamërisë, pa dashjen tuaj keni rënë pre e lajmërimit të një pseudo-shoqate me emrin ”Çamëria” në Kosovë.
Të dashur miq!
Ashtu si kundër edhe ju e dua Shqipërinë e vërtetë, ashtu dhe si e ka krijuar Zoti, ja si në këtë hartë të bukur e cila është punuar me shumë dashuri nga një bashkëkombës dhe bashkëpatriot i yni nga Prizreni, liridon Muqaj. Kjo Shqipëri është e bukur, e madhe, e vërtetë, nga Molla e Kuqe deri në Gjirin e Artës në Çamëri.
Për këtë Shqipëri, të gjithë ne e japim dhe jetën, por në shekullin e XXI, e dimë mirë që padrejtësitë e bëra në Konferencën e Ambasadorëve në Londër më 1913, nuk korrigjohen duke “mprehur shpatat” por duke bashkuar zemrat e duke mprehur mendjet.
Të dashur miq! Nuk dua t’ju kushtoj vëmendje qarqeve të caktuara që me të ashtuquajturën “Pavarësi të Çamërisë”, nuk bëjnë gjë tjetër vetëm se dëmtojnë me dashje kauzën tonë.
Të dashur miq! Nuk mund të ketë përpjekje reale dhe serioze nga askush i cili nuk mbështetet në boshtin e kësaj kauze dhe ky bosht, i fortë dhe i qëndrueshëm është në Tiranë, aty ku ushtrohet presioni në të gjitha nivelet si brenda dhe jashtë vendit. Asnjë diplomaci serioze Europiane nuk do merrte në konsideratë zëra dhe individë jashtë këtij boshti që e them me seriozitet dhe përgjegjësi është PDIU dhe “Shoqata Çamëria”.
Të dashur miq!
A e duam këtë Shqipëri të bukur tamam si kjo hartë e punuar me dashuri?
Po!
Do jetë përgjigja e kujtdo prej jush, por “pavarësitë” e ndajnë edhe në aspektin fizik, ndaj them e bindur se këto veprime janë të qëllimta dhe të financuara nga qarqe antishqiptare me seli ne Athine, Beograd, Rusi e kudo gjetkë, ku është gatuar ngaherë ANTISHQIPTARIZMI dhe ushqehet SHOVINIZMI Ballkanik.
Nuk ushqehemi me lugë bosh por dhe helmin në kupë nuk e gëlltisim dot.
