Dy operacione janë zhvilluar gjatë ditës së sotme në Frashër të Përmetit dhe në Kurvelesh të Tepelenës, ku janë angazhuar 75 forca policore.
Gjatë operacionit janë sekuestruar 25 thasë me lëndë narkotike me peshë rreth 260 kg dhe janë evidentuar dy hangarë që shërbenin për tharje të bimëve narkotike.
Rreth 2820 bimë narkotike në proces tharje si dhe 970 bimë të kultivuara janë asgjësuar me anë të djegies.
Nga ana e Policisë Përmet është shpallur në kërkim shtetasi K. L., banues në Frashër, i cili në momentin e ndërhyrjes së Policisë ka mundur të largohet në pyll.
Operacioni i dytë u zhvillua në Njësinë Administrative Kurvelesh në malin e fshatit Nivicë ku u gjet një parcelë me 970 bimë të kultivuara dhe një hangar me 320 dega të bimëve narkotike të varura në proces tharje.
Mbi bazën e informacioneve të marra në rrugë operative Policia e Tepelenës ka shpallur në kërkim shtetasin K. V., pasi ka mundur të largohet në mal.
Vijon puna për kapjen e autorëve si dhe për zbardhjen e plotë të këtyre veprave penale.
