Ish deputeti Koco Kokwdhima bashkëbisedoi me anëtarët e PS-së në njësinë numër 5, organizata më e madhe socialiste e Tiranës e cila duket se po mbështet lëvizjen politike të ish-deputetit brenda PS-së.
Sekretari për Reformën Strukturore dhe Emigracionin në PS, Koço Kokëdhima, në vijim të prezantimit të lëvizjes politike për reformimin e partisë, u takua të martën pasdite me anëtarët e Organizatës Socialiste 1829/1 në njësinë numër 5, në zonën e ish-Bllokut në Tiranë. Për rreth 3 orë, anëtarët e Organizatës Socialiste më të madhe në Tiranë, i dhanë mbështetje të plotë lëvizjes së nisur nga z.Kokëdhima për reformimin, fuqizimin dhe rikthimin e PS-së te anëtarësia e saj. Ashtu si edhe në takimin hapës të lëvizjes politike për reformimin dhe fuqizimin e PS-së, mbajtur të shtunën e kaluar në Sarandë, socialistët që morën fjalën, përkrahën pa rezerva lëvizjen politike të z.Kokëdhima, duke evidentuar me raste konkrete realitetin e vështirë ku gjendet sot socialisti i thjeshtë si dhe braktisjen totale që ndjejnë prej drejtuesve të partisë dhe të qeverisë, sipas njoftimit tw zyrës sw Kokwdhimws.
Z.Kokëdhima theksoi me forcë se kjo lëvizje politike është vetëm dhe për PS-në, shëndoshjen e saj, rikthimin e drejtuesve të partisë dhe të qeverisë te hallet e popullit dhe se kjo lëvizje nuk do të ndalojë, pavarësisht presioneve ndaj anëtarëve, largimeve të turpshme nga puna të socialistëve që mbështesin lëvizjen e nisur në PS dhe intimidimit të të punësuarve në shtet prej drejtuesve të administratës shtetërore.
Z.Kokëdhima lexoi edhe një letër të marsit 2016 drejtuar kryeministrit dhe kryetarit të PS-së, Edi Rama ku i bënte me dije problemet e shumta që ka partia dhe ku kërkonte llogari, në emër të anëtarësisë së thjeshtë, përse nuk dëgjohet zëri i bazës.
Teksti i letrës:
Më 14 mars të vitit 2016 i shkruajta kryetarit të Partisë Socialiste të Shqipërisë, në një moment që unë e vlerësova që gjërat jo vetëm që nuk po shkonin për mirë, por po morën dhe po shkonin për keq. I dërgova tekstin që do t’iu lexoj juve sot këtu në këtë organizatë socialiste.
“I dashur Edi! Më vjen thellësisht keq për përkujdesjen tuaj të posaçme për të lënë jashtë zhvillimeve politike në parti të gjithë përvojën dhe prurjen më domethënëse politike të rajonit Vlorë-Gjirokastër. Nëse ka një reformim të shëndetshëm të PS-së ky është ai që po bëhet në këtë rajon. Nëse ka një shtim e fuqizim të partisë me 15-16 mijë prurje të reja e cilësore, ky është zhvillimi që udhëhoqa unë atje. Nëse ka një platformë reformuese që e shpëton PS-në nga relativizimi dhe dalja e butë nga pushteti, kjo është ajo që kam ideuar, hartuar dhe zbatuar unë, pjesë-pjesë, qysh nga dita kur kemi ardhur në pushtet e deri më sot. Ju gaboheni kur mendoni që të neglizhoni dhe injoroni këto realitete politike në jetën e PS-së. Ju u kujdesët që të përjashtonit këto kontribute e ide nga debati si në Asamblenë Kombëtare ashtu edhe në tryeza të tjera që po përgatisin Kongresin e partisë. Ju nuk bëtë asnjë përgatitje serioze të Kongresit. Edhe dokumentin themelor të tij e keni paraqitur dy ditë para asamblesë kombëtare. Një dokument i turpshëm për nga cilësia, idetë dhe qëllimet. Ju po përgatisni një kongres për të bërë propagandë inproduktive për qeverisjen tuaj dhe jo për të pajisur PS-në me aftësi, programe, strategji dhe taktika për përballimin e sfidave me të cilat ajo dhe shoqëria jonë do të përballet në 15 muaj e ardhshëm dhe në vitet që vijnë. Unë jam i sigurt se ju po e fusni partinë në një çarje dhe tharje të re dhe përfundimisht shkatërruese për të. Drejtimit pa vizion dhe strategji suksesi, lojërave të zjarrfikësit që ndiqni, lëshimeve të paimagjinueshme dhe dhuratave që u bëni armiqve të PS-së po u vijnë përballë dallgë shkatërrimtare për PS-në dhe me pasoja të rënda për jetën e vendit. Sa thamë më lart, unë nuk kam për qëllim aspak të siguroj përfitime apo mbështetje personale. Unë jam përpjekur shumë të kanalizoj brenda tryezave të punës së PS-së të gjitha këto diskutime, por ju nuk latë asnjë hapësirë, çuditërisht, pakuptueshmërisht dhe për fat të keq. Faleminderit”.
