Deputeti Ben Blushi sot në Parlament rrëfeu edhe historinë e një 80-vjeçari, i cili humbi jetën fatkeqësisht nga ndërprerja e shpeshtë e energjisë elektrike.
Bëhet fjalë për Viktorin, i cili jetonte në mes të Tiranës. Blushi tha se Viktori e kishte shtëpinë në katin e tetë të një pallati dhe u bllokua pasi në lagjen ku banonte s’kishte drita.
Nga sforcimi i tepërt për të ngjitur shkallët e pallatit, Viktori pësoi infarkt dhe u shtrua në spital. Disa ditë më vonë, ai u kthye nga mjekët në shtëpi me bombël oksigjeni.
Mirëpo, në momentin që kishte nevojë sërish për oksigjen, dritat ndërpriten sërish dhe Viktori vdes.
“Ky është rasti i Viktorit. Dy javë përpara se të miratohej Buxheti, rreth orës 17:00 ikën dritat në gjysmën e Tiranës. Luhej edhe ndeshja Tirana-Partizani.
Ky njeri rreth 80 vjeç u bllokua. Do shkonte në shtëpi në katin e tetë. U bllokua për 8 orë dhe më pas, në orën 12 të natës u nis për në shtëpi.
Nga sforcimi i tepërt pësoi infarkt. Është e vërtetuar kjo. Pasi shtrohet në spital, rri një javë në gjendje të rëndë. Më pas, e kthejnë në shtëpi me bombël oksigjeni.
Një ditë e kapin krizat dhe në momentin që i vendosin oksigjenin bëhet më mirë. Por dritat ikin prapë dhe ai vdes. Kush ë vrau? I ra infarkt se ikën dritat në mes të Tiranës.
Në momentin që ai kishte nevojë për oksigjen dritat ikën dhe ai vdiq”, tha Blushi.
