Deputetja e PD-së, Majlinda Bregu u vu në qendër të mediave sot pasi u shfaq në krah të Kryeministrit Edi Rama dhe zyrtarëve të PS në kremtimin e ditës së Europës në Gjirokastër. Bregu ndodhej në rradhën e parë ndërsa mediat i kujtuan se kolegët e saj ishin në cadër pikërisht kundër qeverisë që kishte në krah.
Nuk kanë munguar edhe shumë komente në median sociale ku cilësohej ky fakt si një distancë edhe më e madhe me PD që vijon protestat për rrëzimin e qeverisë dhe krijimine një qeverie teknike para zgjedhjeve parlamentare.
Ndërkaq në debat është përfshirë edhe vet Bregu e cila thotë se do të ndjekë ditën e Europës edhe vitin tjetër kudo të jetë.
“Kujtdo nuk i pelqen, le te marre fryme e te mendoje mire cila eshte e ardhmja qe Shqiperia meriton! Do ta ndjek Europen kudo te jete neper Shqiperi!”, thotë ajo pa shpjeguar faktin se pse është në disa raste në aktivitete të qeverisë e të Kuvendit ndërkohë që PD zyrtarisht ka bojkotuar edhe Parlamentin.
Bregu i përket atyre zërave që i kanë kërkuar Bashës të dërgojë PD në zgjedhje pa saktësuar nëse kjo kërkesë lidhej me plotësimin e kushteve të opozitës.
