Mediat britanike japin alarmin për një shqiptar të dënuar për vrasje, i cili po lëviz i lirshëm në Angli, me 13 identitete për të mos rënë në gjurmët e policisë.
Hektor Mahmutaj është shqiptari i cili refuzon të ekstradohet në Shqipëri ku është dënuar me 25 vjet burg për vrasjen e Gentjan Jahaj në korrik 1997. Babai i dy fëmijëve vijon të kundërshtojë ekstradimin e tij duke e quajtur të padrejtë.
Ai mohon të ketë lidhje me vrasjen dhe se është larguar për tiu fshehur autorit të vërtetë të krimit.
Sunday Express shkruan se 42 vjeçari kishte arritur të hynte në Britaninë e Madhe duke u fshehur në një kamion në dhjetorin e po atij viti. Ai jetonte në Liverpol kur gjykata shqiptare e kishte dënuar në mungesë në prill të 2000.
Sipas mediave, shqiptari do të qëndrojë në Angli, sepse pretendon se ekstradimi i tij është ‘shkelje e të drejtave të njeriut.
Historia e Mahmutaj
Mahmutaj u arrestua me urdhër arrest të interpolit të lëshuar në dhjetor 2006, kur identiteti i tij u zbulua. Ai u dënua me 2.5 vjet burg për armëmbajtje pa leje, ndërkohë që kërkesa e ekstradimit nga autoritetet shqiptare u refuzua në 2007.
Atëherë Gjykata në Britani vendosi se Mahmutaj nuk kishte qëllim të fshihej nga autoritetet shqiptare, por se nuk i ishte garantuar rigjykimi nëse do të kthehej në Shqipëri.
Policia shqiptare ridërgoi një kërkesë ekstradimi dhjetë vjet më vonë pas një ndryshimi në ligjin e tij lidhur me rigjykimet.
Mahmutaj u arrestua sërish në janar dhe aktualisht po rigjykohet nëse duhet të ekstradohet në Shqipëri apo jo.
Të premten e 5 tetorit, gjyqtari, Judge Tan Ikram tha se Mahmutaj mund të ekstradohet, por meqë ai është një shtetas jo i Bashkimit Europian çështja i kalon Home Secretary.
Aktualisht Mahmutaj është në liri me kusht pasi ka paguar 10 mijë paund dhe mund të lëvizë lirshëm për disa orë të ditës.
